2013年5月13日星期一

阻住地球轉

間中會在放工時到惠康購物,那個時段是人流高峰期,通常五、六個收銀櫃檯都開了。好奇怪,次次我揀哪一條隊,哪一條就梗係淪為最慢(唔通排隊都有搭沉船?),起初我以為自己心急,但留心下發現,真不是心急,遠的不說了,就說最近五次罷,均如是,其中有三次係原本排一條,見隔離那條人較少,轉去隔離,點知原先那條走了三個的有、走了兩個亦有,才到我。每次我心都難免暗自嘀咕︰唔係吖嘛!又係咁!

今天又係一樣,前面只係四個人,貨物亦不多,不過後邊兩個用恒生Enjoy卡,本來我一見佢兩個手持Enjoy卡時,我已想轉走去另一條隊了,但一想到經常轉走後更慢,便不走,繼續排。終於到我前面嗰個客俾卡收銀員了,點知都係要有阻滯,又係隔離走了幾個客我才走得,此時此刻,我不得不暗自歎一聲︰宿命呀!前面個客人姑且稱之為有識C9罷。


有識C9︰扣埋Cash Dollar吖!

收銀妹妹︰好!

有識C9睇收據後︰點解Cash Dollar先扣咗一元八架?我明明有四蚊幾Cash Dollar喎!

收銀妹妹取收據看了看︰唔知喎,我按咗用Cash Dollar,佢自動出嘅。

有識C9︰咁你有冇幫我扣Enjoy卡折扣呀?

收銀妹妹︰有呀!

有識C9︰咁點解先扣我一元八Cash Dollar吖?

不待收銀妹妹出聲,我已忍不住了(大佬,你阻住我及後面的俾錢喎!)。

我(親切的)︰應該唔關佢事嘅,佢只係按掣,然後自動運作,扣幾多都唔係佢控制,Cash Dollar一扣就扣晒嘅,又唔可以話想扣幾多嘅,怕且要關都係關恒生銀行事。

老老實實,我真係無興趣去想有識C9你嗰四元Cash Dollar變成一元八角關邊個事,我只係知你阻住我無得俾錢就好關我事囉!我想幫口打發有識C9走,但有識C9不理會我所說,反而開始運用她的所識。

有識C9︰你唔知,一句唔知就唔使做呀?我明明有四蚊幾Cash Dollar架,查實你知唔知咩係Cash Dollar呀?你係唔係無同我扣Cash Dollar呀?我諗你連咩係Cash Dollar都唔知,咩都唔知,點做嘢架!

我已失去耐性繼續等有識C9追究她另外那二元多的Cash Dollar,而且不值她如此奚落收銀妹妹,遂將自己的貨物交與收銀妹妹,示意她計數不要理會有識C9。

哈,想不到有識C9將芝麻事升級至西瓜般大了。

有識C9︰唔該,我要搵你嘅Supervisor!叫你Supervisor出來見我!(好有氣勢)

原來旁邊有個在收銀的職員是Supervisor,她接過有識C9手上張收據一看,說︰無錯呀!幫你扣咗四元幾Cash Dollar,一元八係Enjoy卡折扣。你張單原本三十七元幾,而家你只係俾三十一元幾乍喎,無錯呀!

剛才拿著她天殺的二元多Cash Dollar,大大聲窒人唔使本錢的有識C9,唔好意思都無一句,只是輕描淡寫哦了一聲,便揚長而去!

12 則留言:

ep 說...

那人真討厭, 收銀妹妹可能新, 不懂解釋收銀單, 不過遇着我也會幫收銀妹妹, 叫惡女人自己睇清楚張單先. 用enjoy卡一點也不慢的, 跟用八達通差不多, 只是那個女人煩.

Coffee 說...

ep︰

嗰個收銀妹妹的確是新人,但有樣好,佢聽到惡女人的奚落時,面無露出厭惡的表情。

卡臣 說...

慚愧講聲:我都唔識用

DeepC 說...

通常得閒的人才喜歡生事.

佛爺 說...

西方世界不可能有如此繁複的折扣優惠,否則收銀機大排長龍.

CC 說...

哈, 在超市排隊俾錢唔知點解我又係好心急, 但其實又唔係真係趕時間.

Coffee 說...

卡臣︰

唔緊要,你識俾錢就得喇!

Coffee 說...

DeepC︰

就係,得閒得滯!

Coffee 說...

佛爺︰

香港咩都叫你入會,好煩人!

Coffee 說...

CC︰

唔趕時間架,但有時睇見人哋慢條斯理就更心急!

Ebenezer 說...

如果天口再熱D,有可能初起口角,繼而動武,混亂中有一應聲倒地,送院途中不治斃命。

Coffee 說...

Eben︰

都冇人同佢對打,唔通佢獨腳戲都搞出人命,哈!

Related Posts Plugin for WordPress, Blogger...