煎餅

由我在這公司上班以來，同事之間多次有人提出每人整一樣食物帶回公司大家一起食，每次我都說不參與，因為自知沒甚麼拿得出手，而一班人中有人持反對意見時，好容易就掃了興的，所以一次都搞唔成(火鍋買現成食材唔計，慚愧，火鍋我都剩係幫手開枱、執枱)。上星期又再提起此事，我還未開聲表態，就有人建議由我準備白飯，嘩！如果咁樣我都仲話唔好，我仲係咪人嚟架哩！我自動提出自己再買埋麵包。

星期天一同事Whatsapp佢負責的一煲牛腩給大家看，我馬上被她的誠意打中了，難道自己就真係Hea到剩係拎啲米返去煲飯咩！想起同事話想食蔥油餅，這個以前跟媽媽學做過，不如就．．．

怕當日失手，於是打算先小試牛刀，勁頭來了，却萬事具備，只差麵棍，念頭一轉，不做蔥油餅，改煎「薄餐」。

星期一帶了些回公司給大家試食，如果大家接受，我就不買麵包，改為煎另類蔥油餅。估唔到大家都讚到不得了，一盒「薄餐」迅速被清光，實在太感動了！好，星期三晚我就煎多多，星期四帶回去給大家食。

煎餅煎得興起，見家中有蕃薯，順手煎埋蕃薯餅，星期一連埋薄餐一起帶回去給大家食了。