價值觀

剛外出運動回來。是晚有小小毛毛雨，微風帶著絲絲涼意，本是很怡人的，但却因此令我出少了汗，我倒不爽了。我是個極難出汗的人，晚間出去運動很多時我都要刻意再穿多件T-Shirt，讓身體在運動時可多熱些汗出來。

我家樓下夜間管理員是一位非常風趣又健談的人，在他察覺到我晚上出去運動那天，就被他幽了我一默︰咦！準備參加出年英倫奧運啊？即使明知他素來喜說笑來著，我也忍不住掛上笑臉瞪了他一眼。然後見我滿面通紅回來時，他又來，「嘩！Fit晒！過多幾日天氣再熱啲，仲好，仲Fit！好啦，返上去沖返個靚涼，飲杯嘢，抖下，又聽日喇！」

一個常常掛著笑臉的人，令旁人不經意也能感染到一份喜悅。人啊，誰沒有些十常八九的不如意事，如果對所有不如意事都耿耿於懷，好自然臉上也會掛起未能釋懷的煩憂。說真啊，活了這麼多年，我覺得自己越來越賞識智慧型的「閃」。

上星期有日和一友人在旺角北xx食壽司，大家都沒食早餐，近二點時好餓了，所以一坐低二話不說，一人取了一碟壽司來食。食第二件時我望下價錢，嘩！我們取的分別是$35及$28一碟。

我細細聲同友人講︰你有冇睇價錢？
友人更細聲道，沒有！
我話我們剛才已食了$70(加一)，好貴咯！
友人說，但是好好味喎！
我話肚餓食咩都好味架啦！閃啦！
友人說，下！先食咗二碟喎，點好意思走啊？
我說錢是自己的，連自己作主都不行？
友人說，食多二碟啦！

然後我們再發現$9和$13一碟的，迴轉帶上竟然沒有，我們再取了二碟二十多元一碟的，之後埋單走人。無獨有偶，我後來同C小姐講番呢件事，我話我好Cheap，二人係間壽司店先食四碟嘢，C小姐聽後，瞪大雙眼望著我，說︰我仲Cheap啊！上次我又係二人盲中中入咗北xx，發現好貴，只攞了二碟來食咋！然後即刻鬆人。

我聽後哈哈大笑起來。