賣萌

曾經在星光大道幫一群中學生影相，十幾個人一同為著某個造型擺Pose、做動作，很可愛很有活力，亦很攪笑。先是在金像獎下個個像人像一樣舉起左手嚟張合照，然後走去文化中心後面的石柱排隊伸個頭出嚟影，你話我遮住你，我又話佢擋住我，之後又一字排開影正經版的、攪笑版的，突然聽見有人說︰照張賣萌的。我一聽，在微博常見萌此一說，但不是太清楚此潮語意思，便問︰萌即係點解呀？有人答︰是可愛的意思。哦，那我明白了，賣萌即係「裝可愛」囉。

照張賣萌的，個個都有所動作，其中有幾個大膽些的是極盡可能的擺下自己認為最扮可愛的造型。在我舉機大嗌預備時，其中有個肥仔突然縮咗入石柱後，本著一個都不能少的精神，我停下不按門，而是叫那個縮入石柱的同學行出來，叫了幾次都不理會，我嫌叫痛了喉，加上成班人好講得笑，我忍不住笑著責備︰死肥仔，出得嚟未呀！我影架喇！預備~，然後只見那肥仔作小童可愛蹦跳狀側身一躍而出，同時一歪頭雙手握拳伸出食指一指著自己的臉蛋，賣萌的一笑。那一刻我真的Hold不住喇，笑煞人，個個都笑翻了，就是可愛教主也望塵莫及罷。