焗豬頸肉

見CC將焗爐的功能發揮得淋漓盡致，我便覺得自己冷落家中焗爐多時了，我又焗！昨天第一次買豬頸肉，點解咁肥架？檔口人說係咁架，哩塊都唔算肥啦！我打量掛著的幾塊豬頸肉，好似都差不多，表面都是一層肥糕。算，反正用來焗，怕且表面肥糕屆時都被高溫熱化成油，走了油便可以了，要了最細的一塊，盛惠 $ 33。

製作︰

洗淨後沥乾水，用魚露、黃沙糖 、少量胡椒粉、少量豆粉、少量花雕，醃兩小時，然後用錫紙墊底，放入焗爐，調較至250度，每邊焗十分鐘，即大功告成。

用生菜包著吃。

檢討︰

成功，整體味道口感都不錯，惟醃肉的時間短，厚身的位置略為不夠入味，但都好OK。

不過，別人教我的配料是這樣的︰

魚露、椰糖、蒜泥、芫西碎

還有幫塊豬頸肉按摩下，醃過夜會更入味，口感更好。