落機幫手推飛機

我個人笑點比較低，今日哩件事又讓我大笑一餐。

今日用完午膳，有同事提出搭的士回去。的士司機開緊收音機，正在報導話北京某商場向上行的電梯突然向下，令很多人跌倒，有人受傷。於是，的士司機說，電梯出事，小事啦！大陸啲嘢，預咗架啦！想當年，我去北京旅行，上飛機坐下來等起飛，突然開咪通知大家落返去幫手推飛機。

( 吓？推飛機？ 點推飛機呀？ )

的士司機繼續道，我廿幾歲時 ( 我即刻望下佢，應該五、六十歲掛 )，去北京旅行，諗住搭飛機好威吖，點知佢哋嘅飛機唔夠力，坐嘅人又多，所以咪飛唔起咯！叫我哋落去幫手推，一路跑一路推，推到佢飛得起喇，就嗱嗱聲跑返上架飛機，排係尾跑唔切上返機嘅，就改搭下一架機，再推過，嗰時架架都係咁嘅。

( 死得！我坐係的士度笑到不行，推車助起動我就知，原來飛機都要借助人力推動助起飛，講緊係民航機喎，要乘客幫手推，真係推起咗都唔夠膽坐啦！下嘩！騎虎難下，騎虎難下！)