應瑜和P之約，去了將軍澳某酒樓飲茶。幾個女人見面，吱吱喳喳，Update下各人近來的生活狀況，本來無甚值得寫的，但飲茶期間遇見了一件事。
我們飲茶中途，突然聽見隔離傳來問話︰人呢？哩枱嘅人呢？
附近左右全部應聲望去，只見類似部長的職員，站在一張未至於杯盤狼藉但冇人的「吉」枱邊，手持該是那張「吉」枱的點心咭，一臉嬲怒！
「人呢？走咗喇？食咗好多嘢喎！邊個見到呀？」
然後部長大聲問阿邊個、阿邊個，有冇見到哩一枱的人呀，有冇見到佢哋走呀？答案當然是冇啦，見到仲俾佢哋走咩。有少少躁亂的部長急步打了二個了無意義的白鴿轉，突然說道︰我記起喇！一家三口坐係哩度嘅，我有啲記起喇，有啲諗到個樣喇！說完，怒氣沖沖往酒樓門口方向行去。
這時，瑜開聲道，唔怪得佢做部長，嗰張枱的確坐了像一家三口的，一男一女還有個肥仔，該是讀小四、五的，真係叫咗好多嘢食。不過瑜稱沒有留意那枱人甚麼時候離開的。
之後我們將話題轉移到剛才發生的事上，大家都在狂鬧那對父母。我見P沒多吱聲似乎若有所思，問她諗緊乜嘢，P望著我們，如是問︰如果真是走投無路了，你們會帶仔女行乞，亦或帶仔女行騙？
瑜搶先答，梗係情願乞食都唔可以去做欺騙人的事啦！
......
10 則留言:
香港根本唔會餓死人，因為有綜援，食物銀行等等。如果真係走投無路，搞到要食霸王飯，亦冇理由會揀高級酒樓。高級酒樓係我估架咋，你去得嘅，點都唔會太差啦，哈哈！呢對父母，真係，ＸＸＸＸＸ！罪過罪過，斯文人係唔應該講粗口嘅！
這樣食霸王飯的人因為始終不多, 所以酒樓才沒有警覺和設法防範, 這些人應該多是貪小便宜的心態, 不是窮得沒飯開, 到別人婚宴去吃免費餐也有呢, 不足為奇.
Arm︰
首先多謝你睇得我咁「高級」，其實我係極不講究食的人，一來唔識整，二來沒乜$$可出去享口福:p
細路哥白紙一張，唉！
路︰
你講得啱，係貪小便宜的，趁人哋忙走人數，最不值是教壞細路。
我第一時間想起，樓面職員是要賠錢的！真的很慘。Ok, 回應妳的題目。妳的問題充份證明妳是個老實人，加是個好人。一般情況，三個人不會同時離座，大概是母親帶孩子先走，母親會對孩子說，父親留後買單;)
嚴明︰
應該要賠的，因為嗰個部長好炆，後來佢親自來執拾嗰張枱，黑面兼重手。
至於你回應我的問題，睇來你都很善良，我當你讚緊我:)
他/她們先後離場，我們都有同樣的猜測。
我都試過，八個人坐了一張大檯，隔離坐了兩個地盤工人搭檯。食至中途，一位侍者突然問我們，那兩位去了那裡？跟著他叫了個部長來，兩個人談了幾句，氣憤到飛起。我們也沒有留意那兩個地盤工人何時走了。
佛爺︰
記得我初初出來做嘢時，有次部門阿姐請飲茶，食緊嘢時，阿姐自己率先發現唔知點解啲人開了二張咭，分別都印上了點心數，之後她只埋了其中一張咭的數，另一張有同事替她收起了。
平日那是位很能幹的上司，幫公司賺錢的老闆愛將，於是，「人是立體的」說法又浮現我腦海。
開始見人食霸王餐，睇嚟市況有轉勢跡象！
Eben︰
經濟學家對民生總是很敏感的。
發佈留言