要換窗簾，不想再用路軌，打算改為木通或鐡通棍。到旺角打下價，廳及三房，平的二、三千，貴的四千多。猛推介我做四千多的，妖！我心諗那成套豪華簾，莫說屋細容不下，就算容得下都不是我杯茶！如此「幅員遼闊」，我睇到都頭痛，日後點清洗打理呀？
去另一間，我話不想再用路軌的，想轉做木通或鐡通的，點知阿店東又好專業好肯定地同我上了一堂課，而家唔興木通鐡通架喇！原來我封閉咗咁耐架？我以為轉一樣新嘢，阿店東竟話得出過時，嘿！我呆著不知繼續不繼續好，繼續問都冇意思。
從來不喜歡行旺角，上星期六、日行到腳軟軟，仲要係冇結果！
向朋友查詢，友人C說今年七月在深圳車了一套窗簾，廳窗及三房窗，唔包路軌，盛惠人仔500多，再問友人R，很權威地說，用宜傢的鐡通，搵人裝鐡通棍，上深圳車窗簾布，平、靚、正！
噢！一天都光晒！
14 則留言:
講開又講，我屋企套窗簾都係深圳東門貨仔^^
友人R又幾好計喎
我都想整過套房窗簾，因為縮水，而且開始透光，阻住我訓覺...
l.minor：
哈哈！比你笑死我！窗簾縮水，都會阻住你瞓覺。
Eben︰
原來真係好多人都在深圳做窗簾，價錢實在差太遠了！
卡臣︰
因為佢啱啱就係咁樣換完全屋窗簾。
Minor︰
如果你唔換窗簾軌，易好多架！可度好尺寸去深圳羅湖或東門做，佢哋有埋式樣俾你揀，即日可取。
佛爺︰
其實我睇到minor話布縮水、透光，咗住瞓覺時，我都笑了！:)
佛爺 & Coffee:
呢個係最主要原因要整過d窗簾呀！窗簾縮了水，有光”瞪”住哂我訓，好大罪架！
妳不妨到佐敦寶靈街試試，有兩間水準高、款色多元化，價錢合理的選擇，我光顧過幾次，very good！
minor︰
這點我較為幸福，睡得好，放假要瞓時日光日白一樣瞓得香。
風月︰
噢！謝謝，一定抽空去，有冇店名？
找不到單，忘記了，條街只有兩間，一左一右，約在街中段，很明顯，容易找。以彌敦道計，第一間是老人家看舖，第二間是中年夫婦看舖，兩間都很老實，以我對你的認識，應該有喜歡的。
風月︰
收到！謝謝你！我會去看，希望物美價廉！:)
發佈留言