2013年7月2日星期二

天馬行空

昨天收拾書桌(已變成手工藝工作坊,嘩,坊,好似好大),很雜亂,太多等使唔等使的工具,旁邊地上是布料,執下執下,在一堆信件裏頭,發現報稅信件(還完整無缺,連拆都未拆)。在報稅這件事情上,我沒有甚麼時間觀念,向來拖得就拖,唔到最後日期都的唔起心肝。打開一看,早早過了報稅日期,我不是個好市民。

跟手填好了,想到是公眾假期,該不收信件吧,怕忘記,即時放入返工手袋。到了今天下午,向公司管文具的同事買了一張郵票,貼好,想著放工經過郵筒時寄出便可。但是,我仍然可以忘記囉!由放工到回家的途中,最少都經過三、四個郵筒,又或者只要曾打開過手袋,都會見到囉!見到時已是回到家樓下開信箱了。

那刻我想如果郵局發展埋向家庭信箱收信件的服務多好(想下都得掛)!然後又猶豫好不好即刻行去最近的郵箱,這樣我都算將今天要做的事做了。唉,算啦,明天寄出都是一樣了,但萬一明天又記不起呢?不會罷,即時在心默唸寄信寄信寄信寄信寄信寄信寄信寄信寄信寄信寄信寄信寄信寄信寄信...

* * * * * *

下午清潔姐姐入嚟聊了幾句,說我哋的辦公室養靚人,皮膚紅紅白白,我話係囉,週圍成日有靚人,肥力跟口說,梗係啦,同你相比(妖,想嚟手飛佢一嘢)。

今晚食了兩件一大一小的榴槤做晚飯,榴槤好食肥人。邊食榴槤邊想到,阿媽不在身邊好自由,想食咩當晚餐都得(咩說話呀,咁都講得出,嘿嘿,不敢不敢,諗下啫諗下啫,阿媽唔會知)。

吃完榴槤再飲了碗瘦肉鮮淮山湯,飽到打呃,係榴槤味。提早刷牙,落埋妝,見時間多了好多,用鮮奶蛋白溝麵粉敷面。十分鐘後清洗乾淨,想到生活中大把可DIY的敷面用料,如果自己能堅持做,何需向人大灑金錢。

 減肥亦是一樣,靠自己,所以一直都沒打算買SPA機兼入會。是否一個不論在思想及物質生活上都達到中產的人,對社會發展多有脾益?那我一定拉低晒平均指數(爛笑話),我一點都不中產!有否阻礙社會進步呢?但我有堅持回收膠樽喎,有加分掛...

還有很多想講,我的腦袋唔知裝了乜,很天馬很空。



8 則留言:

DeepC 說...

上網submit 稅表可以延長deadline一個月的, 兼省郵費. :)

記得某某講過: 「飲咖啡、睇法國電影嘅人係中產」,你實至名歸囉! ^^

Coffee 說...

DeepC︰

遲交稅有罰款,遲報稅唔知點。

我係低消費者,中產的那種隨意奢侈,望塵莫及。

ep 說...

好似心情好靚, 像妳那樣忘了寄信的事情我試得多, 後來索性手拿着要寄的信出門,不要放袋子裡, 那就不會忘記了.

Armadillo 說...

話時話,我屋企樓下大堂真係有個郵箱收集要寄出嘅信件(當然要自己貼好郵票),係咪郵差叔叔派信時順便收埋就唔知嘞,不過真係寄得出囉!

Coffee 說...

ep︰

偶然沒心沒肺過活,感覺好輕鬆。

用手拎住都係一個辦法!

Coffee 說...

Arm︰

經你一講,我記起自己好似好耐以前問過樓下管理員,依稀中好像真係有喎,只不過已極少寄信,早忘記了,等我了解下。

Ebenezer 說...

先排稅局搞埋d乜乜物物broswer唔support,老實講,我覺得上網填稅表仲煩過手寫寄稅表。

Coffee 說...

Eben︰

我個人有時好狹隘,對自己無興趣的事情,完全不願有新動作,會出現學習障礙。但對有興趣,至少不抗拒的,學習能力頗強。

Related Posts Plugin for WordPress, Blogger...