買家居電話

家居電話是N年前唔記得因乜事得到的贈品，是個室內無線電話，近日壞了。

諗住呢啲細雞嘢，於是走去日本城睇，但貨架上擺放出來的家居電話不多，跟住行去CMK，感覺上覺得張毛記個名都係賣小件貨物居多，怕且都平過豐澤罷。

近年來家居電話已變得可有可無，睇而家甚麼申請呀，甚麼填表呀，好多時都只填寫手機號碼就行了。所以揀了一個差不多最平的，一來室內無線電話不是複雜的電器，加上又不是住得很僻遠，無需咁強大的接收功能。

取出銀包，準備俾錢，嗱嗱嗱，餐餐都係咁嘅。嗰個 sales 後生中女在收我錢前，向我推銷同是樂聲的另一款，正在做減價優惠，原價四百幾，現賣三百幾，平了一百多元，比我揀的那個貴五十元左右，但功能多啲接收強啲。我問點解剩係呢款電話減價，佢有答，但已唔記得佢講咩了。其實基本上在我已決定了，攞緊錢出來時，佢又突然向我推銷呢款減價電話時，佢就已經做唔到我生意了，因為我會覺得之前擾攘一輪，阿 sales 後生中女都還唔知我想要啲乜，既然佢唔知我想要甚麼，又如何介紹合適的產品呢，我不信任她了。

諗住細雞嘢唔去豐澤，最後都係去了豐澤。哈，一看，剛才推銷給我的那款，在豐澤再平多三十元，那刻我相信該是刻意減價傾銷，該是不大好用的產品罷。盯著那電話，和其他相比較，終於俾我發現，最大的敗筆在顯示屏太細，難怪促銷，嘿嘿！

在豐澤職員解說下，我放棄初衷，不揀單機，買了室內無線雙機，盛惠四百元。