暖浴寶

冬天最難頂的二件事，一係朝早起床，屋內沒有暖氣設備，要由暖笠笠的被斗捐出來，由溫暖走入寒冷，嗰刻真係好難頂，仍未慣，未解決。二係沐浴梳洗，我一般怕凍，但冬天沖涼嗰種凍就真係凍到面容扭曲，全身抽搐般，仲要光著身子搽潤膚露。所以冬天更大條道理絕對素顏，只搽護膚品上臉便算數，見得人見不得人都唔理了，為的是晚上省下一回卸妝油潔面的步驟，凍少啲。

不過最近可算真正解決了冬天洗澡冷的問題。新年期間在大陸見到掛在浴室用的暖浴寶，沖涼時啪著它，很快浴室便和暖起來，沖涼時不覺得凍了。上年我在香港買了暖風機，但暖風機的設計不是在浴室使用的，只不過沒有其他辦法，所以照攞去浴室用。而這暖浴寶是專門為浴室而設計的，見價錢唔貴，安裝又極易，便買了二個回來。

很好用，如果家中一樣有人沖涼怕凍怕到傻咗嘅，不妨去買個回來。開著時浴室好暖，連帶水呀煤氣呀，都可以慳番啲，好像之前，太凍，我唔捨得關水喉，總是淋完又再淋，淋極嗰身都似未暖咁，所以一定用多水多煤氣。但淋得太耐太熱又唔得喎，因為如果沖走晒身體皮膚啲保護油，搽多多潤膚膏都保不住瞓到半夜便周身痕了。如今好了，開著個暖浴寶，浴室的溫度暖暖的，沖涼再唔使凍到心都縮痛了，搽潤膚露可搽得仔細啲。對，還有早上起床後，衝入浴室第一時間便是開著個暖浴寶，舒適很多。

(應 SKII 的要求，影了相貼上來，本來我想偷懶，嘿嘿 :P  這暖浴寶樣子像盞燈，不漂亮，但這唔緊要，不用三百元人民幣，W數不高，才 500 W，而我那暖風機是 2000 W 的。)