2010年11月15日星期一

時來運轉

今日中午十二點,琴送到家了。哪天想拿起相機時,我會貼張相上來的。

#  #  #  #  #  #  #  #

安置好部琴,我外出去二間銀行。去到第一間,見只得六、七人在排隊,心中暗喜。殊不知在這間銀行排了足足四十分鐘才到我!等到忟!起初開了三個窗,整下得二個,其中一個職員可能去洗手間,但返來後竟然幹起數錢的行當來,真係忟死人了!原來平日的銀行是可以如斯謀殺時間的。仲有就係,有一個窗口的客人,由我排隊起就見佢在其中一窗口了,到我走佢可以仍未走得,到底出了甚麼問題呢?她要做的是將幾個戶口合併,將乜卡物卡統一,好難架?我由那間銀行出來,一定如塊忟薑 一樣!

原本約了人2:30pm,推到3點。去到第二間銀行,死得!有成二十人排隊,我心中宣佈放棄,即使我身懷「巨款」,點排呀?等得來蚊都瞓了,我諗住打下簿就走人。點知打了三次都打唔到,最後果次顯示壞機,同銀行聯絡咁上下的字眼。我死死地氣去找職員,又真係估唔到,個女職員叫我係優先隊等,哈!又會咁死好運!埋得去窗我點會剩係打簿呀?優先隊冇人排,埋去就到我了。職員幫我打完簿後問我需唔需要取錢存錢等等,我笑到蓮子蓉口面(要用手袋放在窗檯遮住半邊面,以免身後排長龍的人客轟我走),說,我要存錢!職員被我感染到笑埋一份,說,好呀!存幾多?我說,存X萬(用來找琴的卡數)。

銀行出來後我一直開心不已。諗住無奈下惟有身懷「巨款」去赴約,却又莫名其妙被打救了。

PS︰後來我才想起銀行應該有自動存鈔機,是我生疏了。
 

14 則留言:

卡臣 說...

存款機好方便架
入一疊同妳自動數錢
快過人手

l.minor 說...

哈哈~

果邊浪費了時間,不過另一邊卻幫你賺回時間~

韻味熊貓 說...

哈哈!天無絕人之長龍!

Ebenezer 說...

存X萬cash?放在床下底嗰D?

嚴明 說...

我極少到銀行浪費時間. 基本上, 自從有了ATM 這東西, 已經很少走進銀行, 現在有e-banking, 就更加少了. 所以如果真的要去銀行, 逼不得已, 必定會做好"久等" 的心情. 好像也見過一些客人, 他們可以在櫃位前呆很長時間, 也好想知道他們在搞甚麽大買賣. 但如果是大買賣, 不是應該請他們到經理房坐的嗎?

Coffee 說...

卡臣︰

係咯!我昨晚在blog寫日誌時,突然醒起可用機入鈔,好彩我都入咗,如果唔係就要袋住啲錢四圍去了。

Coffee 說...

minor︰

造物的神奇力量真令人嘖嘖稱奇!

Coffee 說...

佛爺︰

對呀!仲有啲運!

Coffee 說...

Eben︰

我都想牀底有一大舊錢呀!

Coffee 說...

嚴明︰

睇來我都要重組下我的理財方式了!

e-banking我沒有用,依你講應該好方便,睇來日後我都可試用下。

Ebenezer 說...

Coffee n Tea:

如果妳係由A銀行拿$去B銀行,其實無需要由A銀行Draw cash 出嚟再去B銀行排隊入$咁危險,妳只要開張cheque,走去B銀行存入所指定戶口就得喇:)

Coffee 說...

Eben︰

係咪開本票呀?我想慳番手續費嘛,cuz I am cheap!:p

Ebenezer 說...

No,普通支票都得ga lar^^

Coffee 說...

Eben︰

但我冇果間銀行的支票簿呀!:P

Related Posts Plugin for WordPress, Blogger...