2010年11月5日星期五

心理潔癖

每日返工搭地鐡,見見埋埋唔少難頂的現象,( 我可能有心理潔癖 )。

首先,今早在尾二站後,乘客少了很多,一、二個人坐整張位的比比皆是。我對面坐了位女仕在翻看報紙,旁邊坐了一位男乘客,佢哋中間隔了一個吉位。我見個男人側個頭過去睇埋一份,起初我以為有咩特別新聞吸引咗佢,原來唔係,女仕揭去另一版時,個男人依然如斯驚死人唔知咁伸個頭過去共享份報紙。我心諗睇下個女人忍到幾時,哈!女仕又冇嘢喎,仲特登向男人果邊攤開啲咁喎。俾著我,實郁下身側咗下眼架喇。不過,其實係咪有問題果個係我呢?你介唔介意在地鐡同三唔識七的人一起睇一份報紙呢?

講開又講,在地鐡難免陌生人之間近距離接觸,同陌生人近距離接觸下,你哋覺得最難頂的有啲乜呢?我想大家答下我的發問,等我睇下我覺得難頂的係唔係同大家大同小異,定係我唔夠包容呢?不過答中無獎架喎。:p

12 則留言:

Ebenezer 說...

最難頂有:

1) 俾人用個格肋底對住;
2) 口臭混埋唇膏味;
3) 大大聲講電話(仲要喪笑),加堆超高音雞仔聲;
4) 勁化妝,戴冇玻璃眼鏡,假眼睫毛由鏡框中插晒出嚟;
5) 十隻手指都係粒粒珠水晶甲,好似指甲生cancer咁...

仲有,等其他人講啦,唔講咁多住^^

卡臣 說...

視乎對方是否異性/靚唔靚囉

Armadillo 說...

最難頂係成個身挨晒埋嚟,我最怕同三九唔識七嘅人有肌膚之親架嘞!

佛爺 說...

最難頂班友,企係門口阻住,唔行入D。

Coffee n Tea 說...

以上各位︰

好彩啫!你哋覺得難頂的,我都有同感!每當我見到呢D情況,我就諗點解佢哋自己唔覺嘅?
有一次,我遇到一對夫婦,著到去出席甚麼飯局般隆重,個男嘅件西裝一陣潮溼天焗出來的那種酸臭,好嚴重咁臭,我要擰開面去呼吸。我奇怪點解咁都著得出街架?

笑談風月 說...

隔離位持續郁身郁勢,超難頂。

laulong 說...

狂打噴嚏,仲要唔掩口鼻,我見到就一边閉氣,一边心裏咒罵!

Coffee n Tea 說...

風月、校長︰

早晨!哈!既然大家都攤開來講,我真係要數一數了。
我很討厭坐隔離的不停郁來郁去,或不斷係手袋摷嘢,隻手踭係咁撞下撞下過來,或者係睇報紙,隻手撐晒過來。打噴嚏唔掩口鼻我深惡痛絕,如果係我附近,我一定以不友善的面目睥去,有一次有個不停咳嗽的人坐我隔離(病,好無奈!),但無戴口罩,我企身走開,懶理眾目睽睽!

仲有,好憎不論男女的大腿輕輕挨住過來,即時成身毛管動!還有拎住支電話由上車講到落車,在閒話家常,如果仲係口腔超唔健康的人,真係作嘔到想死!

嘿嘿...

l.minor 說...

1. 加拿大對住你個頭
2. 成身臭汗(雖然知道佢未必想)
3. 架車好迫時,重好似係自己屋企睇報紙咁
4. 有人對住你個頭噴氣
5. 男人老狗,俾人用果度頂住(我試過啦!真係頂~~)
6. 有地鐵黎,想讓人出先,點知俾其他人打尖(呢個好似離咗題)

要寫應該重有...

Coffee n Tea 說...

Minor︰

我認為呢啲都該列入學校公共禮儀課程統一教導下!

你俾男人非禮呀!!

呢種情況我以前遇過幾次,很討厭!
有一次我有個朋友話俾我知,佢有次遇到以上事時,咁啱心情差,出聲一句鬧去︰你磨夠未呀!果個人嚇到走夾唔抖!

l.minor 說...

你磨夠未呀?真係笑死!我突然諗到重賤嘅一句,就係:要唔要等車開,拎出去磨呀!

Coffee n Tea 說...

minor︰

是那些行為賤!

Related Posts Plugin for WordPress, Blogger...