2010年11月8日星期一

誰之失

受一位搭上搭朋友所托,去幫手買幾件施巴的孩子護膚用品。週末去了某間其中有賣施巴系列產品的專門店,一問即有,過程很順利,付款離開。

出了門後,我看下手上張單據,發現店方將所贈送的二細包不記得是甚麼的試用產品,打上$36,又再減返$36,然後總件數比實際須買的數多一件。我覺得有點不妥,為免在收返朋友錢時費口舌,我折返店子,同店員講,可否不要贈品,我希望張收據只列印著我所買的數量,或者用手寫張收據給我,而我將機單給回貴店。店員稱自己是新來的,程序不熟,要致電問下。一輪不短的電話(我已開始不耐煩了),然後,店員答覆我,問過了,可用手幫我在機單上劃去一件產品來解決,我差點沒暈低!沒好氣地說,你劃去同我自己劃去有何分別?我稱我幫內地人買,托上托的,再托人帶上去,不想為張單要解釋一輪,你手寫張單給我吧!阿店小姐說,問過了,店舖規矩來嘅,不可隨便使用收據簿寫收據給客人。我心在諗,出「殺手鐧」吧!於是,我說,如果你唔寫過張收據給我,我唔買了,煩麻你退回錢給我!諗住點都唔會有生意唔做掛!點知店小姐手拿收據簿窒咗下,但還是說這是佢哋公司嘅規定,唔寫得收據。

店小姐幫我出機辨退款時,我默不作聲,但講真,可能一臉不屑!是對間舖的管理很不屑!不知是指令不清還是店小姐資質有限,所以演繹不當,有乜理由會為一張收據而失去幾百元生意!不知幾百元對一間舖面不大的公司是何數目,但假如真的為單據問題而趕客,那怎會是幾百元生意的問題?單單我吧,佢哋可能趕走了一位日後常會光顧的人客,我本身雖然少用施巴,但我深圳有搭上搭的一些朋友嘛,舉手之勞的事,我樂意幫人,仲要好多時佢哋本身唔知該買邊種,信任我由我話事的。

由那間舖出來,我轉去藥房買。藥房價錢較平,我當然知,只是原本諗住果位內地朋友小康生活,只得一個二、三歲的孩子,叮囑買香港人常用的,買好的,(其實我經驗不多),我只想到施巴,然後慎重其事才到那店舖去買,點知......

12 則留言:

Ebenezer 說...

冇出手單嘅程序? 咁萬一佢個POS down機,係唔係要即刻全店拉閘唔做生意?

嚴明 說...

不知道那"小朋友" 又會怎麽樣在朋友面前提起這事情:P

卡臣 說...

大公司好僵化

Coffee 說...

Eben︰

我諗極唔明點會咁就無咗啲生意呢?我認為是店小姐所問的是另一舖的,又是不熟運作的職員!

Coffee 說...

嚴明︰

我諗「小朋友」不知生意人生意大過天,過得海就是神仙,只要你肯買,不要機單要手寫單,好閒事!
佢可能會講,因為一張單就唔買,有冇搞錯!攪攪陣,冇幫襯咯!

Coffee 說...

卡臣︰

真係好蠢!

笑談風月 說...

與大企業制度無關,冇得變的是人,人腦最笨。

佛爺 說...

可能未有先例可循!嘻嘻!

Coffee 說...

風月︰

我當時等佢問人等到忟!真的細細聲講了句︰點解咁唔識變通架?

Coffee 說...

佛爺︰

如果我係老闆,知啲員工咁死板至趕客,一定要再培訓過!

Armadillo 說...

以今時今日嘅服務態度嚟講,個店員肯幫你做退貨已經算唔錯架喇,你就原諒佢啦!

Coffee 說...

Arm︰

我相信一般來講,只要不退貨,個客的要求會盡量滿足的,我估佢唔到!

好的,我原諒佢, 其實我一早已原諒了:)

Related Posts Plugin for WordPress, Blogger...