2011年10月24日星期一

有時瞬間的念頭很弔詭

我的智能手機出現莫名其妙當機情況有三星期了,由最開初的對她死得不明不白,到後來知道甚麼情況下死神會來。只限於知道,自己解決不了。終於忍無可忍,大老遠跑到旺角去搞維修。

交機前突然想起,有一次在MB曾用這手機拍下一張肉照,好像未刪去。即刻由頭到尾檢看手機相機內的二百多張相,果然還在,一額汗!收機的職員很好人,知我未備份手機,忙幫我將手機內的相片及電話存到 M.SD Card。聽了我說了電話的情況後,認為不是甚麼大問題,著我三、四個鐘後回去取機。

三個小時候後回到維修中心,取了輪候號碼籌,跟手拿了本雜誌,邊翻閱邊等叫我號。大約十多分鐘後(世間太快的事皆不踏實),聽見,有冇 102 號呀?我望下水牌遠未到我號。師傅話你部機要換機件,但目前未有,要下星期,你預大約要一星期的時間先可以嚟攞番部機。吓!不是說只是小問題嘅咩!

一個星期沒有電話用!一個星期!!我沒有後備電話!

接過職員遞來的維修通知收據,腦海一片空白,剎時間想不清該如何應付未來的一星期,思想混亂遊走。首先該是重新戴上手錶吧,回家前記住先去買個小鬧鐘,希望好手氣買到個準時的,如何和朋友保持聯絡呢,找不到我是否有人會擔心呢.....心神愰惚地步入地鐡站,想到每格式化一次手機,好像連人也一起格式化了。

假如我真的如斯離開了,日子當然也一樣照過的。只不過︰

思想混亂遊走時拾步行去地鐡站,途中思想被絆,說不出原因,有時啊!瞬間的念頭很有些弔詭的意味,我一頓腳,轉身返回維修中心。請問有沒有電話可供借用,我的電話要留下換機件,話要一個星期咁長。哦,你跟我來,搵個職員睇下幫唔幫到你。噢!黑暗中見到微光!你幫呢位小姐睇下有冇手機可借用,如果冇都...就話冇咯!(唔知點解,覺得他尾這句好有問題,擺明敷衍我。)

三幾分鐘後,小姐,真係唔好意思,全部電話都借晒出去了。你睇真架喇,再睇仔細啲啦!放借用電話嗰度唔係好大架,睇得好清楚,真係一部都沒有,啲客人借咗嘅全部都未還。剛才黑夜中閃爍的螢火蟲不知死去哪裡了。來到這田地,我忽然生出一念頭,都係不維修了,起碼還可打出打入,還可當鬧鐘用。將手機給回我吧,我暫時不維修,可否留個維修部電話號碼給我,下星期我先打電話了解你們有了零件後,我再拿手機來維修。她不太情願但又拒絕不了地起身去了,不知過了多久後(係我再失時間感覺),她回來說,小姐,幫你問過了,原來你部機師傅都仲未檢查,你六、七點再回來睇下結果。

哈!都唔知嬲好定笑好!剛才不知飛咗去邊的螢火蟲又飛回來了,看看電視機上的時間顯示,當時是三點四十分。我五點再次回到維修中心,等到五點四十二分,叫我號了。交機給我的職員說︰師傅檢查過,手機正常,應該是你張外置 M.SD.Card 有事,你返去先 Back Up 你張 M.SD.Card ,然後將佢格式化後再用。

 

10 則留言:

嚴明 說...

哇,這得了,是那個牌子? 他們看也沒看, 就說要丟低一星期, 這服務流程, 都給妳踢爆了! 不過, 說到後備手機, 在Facebook 裏問問, 大概就有了;)

Armadillo 說...

咁做分明係玩人人啦,真係要學壹仔咁,俾五個劣佢!話時話,喺呢個年代,如果出街唔記得帶手機,直頭覺得冇晒安全感架!

Unknown 說...

買定部後備電話,通常後備電話=舊電話

Coffee 說...

嚴明︰
牌子嘛,我不好說哩,我覺得是某個流程有職員疏忽了,並不是故意的。
FB我有,不過屬低調派,叫我係FB問人,我不會的:)

Coffee 說...

Arm︰
我覺得不是刻意的喇,無相干:)
電話係我的靈魂,冇電話點得架!

btw,你今日篇貼文看了:)

Coffee 說...

宅男︰
宜家換電話時,舊的都可以 trade in,所以冇留下。

卡臣 說...

現代人不能沒電話出街,嚇死妳了

Coffee 說...

所以關於電話,我那天想了很多!

韻味熊貓 說...

咖啡:

手機好少壞的,因內裡只有一片東西而已!

Coffee 說...

佛爺︰
一片東西而已!這片東西讓世人瘋了。

Related Posts Plugin for WordPress, Blogger...