2011年7月18日星期一

很愉快的一天

今日跟米奇去舒適堡試玩瑜珈,所謂試玩即係免費的意思。35分鐘內大部分動作我都做得到,這該歸功於我平日有拉筋的習慣。以往在家我直接在木板地上做拉筋伸展,相比下,原來在瑜珈墊上做舒服很多亦容易很多,所以明天我會去買張瑜珈墊回來做我自家創的拉筋伸展運動。

之後下午茶時段我們仨去了和民,原本是食午餐,點知份量足夠飽到當埋晚餐,仲要雪莉話,反正都係喇,唔爭在叫埋甜品。我和雪莉都叫意式綠茶芝士餅,綠茶粉帶點兒苦味,同甜甜芝士餅又幾配合喎,唔錯。米奇叫的是和民自家出品的牛奶蛋白布甸,有驚喜,超讚!米奇說幸好佢原本想叫的焦糖布甸賣完,我即刻說,因為比牛奶布甸更好味咯!噢,於是我們同時說,好,約定下次來食焦糖布甸!

我們足足Talk了三粒鐘有多。期間我話我有件醒神嘢要分享,她們二人即八卦精上身,碌大雙眼望住我,點知我才講第二句,雪莉即打斷,說︰唔該直接去高潮!我瞪雪莉一眼,不甘示弱地︰冇前奏,高潮大打折扣架喎!哈,那邊廂米奇更上一層樓︰前奏太長喇!我哋等唔切。三人均被逗得笑不籠嘴。笑罷,我說,稍安無躁,稍安無躁,為保障你哋八卦的高潮質素,我堅持先來前奏,最多我加多幾錢肉緊俾足感情,又點話吖。講完我率先再次失笑,問你死未!所以話三個女人一個墟絕對係冇講錯嘅,乜都可以講餐飽,笑餐死。

4 則留言:

韻味熊貓 說...

咁係乜醒神野?有前奏同高潮?

嚴明 說...

哈,身為男人,一般只對結局感興趣:P

Coffee 說...

佛爺︰
真係架!原本想寫篇貼文,但有啲顧忌咯:P

Coffee 說...

嚴明︰
好熟的朋友都一樣直來直往,不要修飾。

Related Posts Plugin for WordPress, Blogger...