2011年7月17日星期日

還有甚麼可給你

部聯想筆記簿型電腦仔,是去年初用二千七百多元買的,二星期前被R弄裂了螢光幕,睇樣是沒有得救了。仍未棄置,待搵人檢查作實。


 這是新買的HP牌電腦主機,豐澤、吉之島梗價四千八百多,後來其中一Sales以不知甚麼名堂平二百元利誘,於是我就範了。



主機買回家,接上舊SAMSUNG芒,才知舊芒已壞了。無可奈何又買埋新芒(見下圖),20吋,盛惠$1050街坊價!BTW,原來而家啲芒規格是16X9,見長方型,以前4X3,見正方型的不再出了。




PS︰見校長貼文說一生兒女債,我又何嘗不是。間中見兒對著電腦閱讀英文,查英文字,閒來還搜尋李斯特、貝多芬、郎朗...我幾乎熱淚盈眶,但更多的是見兒上YOUTUBE,打機,面書,睇波,唉!一身兒女債!

#  #  #  #  #  #

今日有個靚仔上門做人口調查登記,我才記起之前收到人口普查問卷,被我隨手放在一邊,忘記了。我問可唔可以在門口填寫問卷,問完我都覺得自己好過份。在客廳坐下,我見靚仔調查員手執一份門牌號碼清單,一問,原來每日要上三十戶人家做調查登記。


晚上回家時,在管理處見另一人口普查調查員在做上樓登記,同我一同乘電梯的二位住客,他/她們的交談,比我更顯得對人口普查一事所知無幾。

女︰係咪要去晒全港家庭做登記呀?
男︰係掛!
女︰咁係咪一個人要做晒全幢樓的登記呀?
男︰唔知喎。
女︰咁如果啲人唔係屋企呢?
......
以上佢嘅問題我都識答,因為我之前問過,正想三唔識七都答下佢時,佢哋出電梯了。

6 則留言:

Ebenezer 說...

弄裂了螢光幕? 唔通佢真係打爆機?

Armadillo 說...

而家買芒,20吋好似細咗喎,最好就22至24吋啦,睇戲正好多架!另外,呢兩日我都見到好多做人口普查嘅𡃁仔𡃁妹,不過靚仔靚女就唔多覺眼喎!

Coffee 說...

Eben︰
其實具體我都唔知佢點弄成咁!總之就係煩!

Coffee 說...

Arm︰
20吋擺係佢書枱OK架喇,加上佢之前部電腦唔係自然壞,所以唔想「益佢」買咁大嘅芒。
你記得報就唔使上門,唔錯。昨天上我家嗰個唔錯架,唔輸俾你年輕時的相嗰啲樣架。

路漫漫其修遠兮 說...

會不會是聯想的質量不好, 不關妳兒的事呢. 之前我也有一部聯想手提電腦,是跟PCCW簽三年寬頻上網送的,用起來覺得不錯,誰知剛過一年保養期後某一天早上,怎樣也開不了機,螢幕漆黑一片.那手提電腦我很少帶出街的, 肯定沒有跌撞過. 問過師傅修理不化算,300元賣掉了.

Coffee 說...

路︰
聯想的質量係差啲,但哩次真係關佢事,佢唔執拾房間,混亂之中弄裂了芒。

你部機開唔到還可賣$300,唔錯吖!

Related Posts Plugin for WordPress, Blogger...