2011年7月4日星期一

野蠻的說

今早返工途中入惠康買二包消化餅,俾錢後手持八達通準備啪卡儲分,但收銀員一直冇問我是否有儲分,以我長期幫襯惠康的熟知度,看收銀員的動作,似乎過了啪卡儲分的時段。

我︰    係咪有啪卡儲分架?
收銀︰呀!!係呀!我俾返二毫子你。
我︰    呀?!係咪因為過咗冇得啪,所以補二毫子呀?
收銀︰係呀!你下次記得早啲出聲啦!(重語氣)
我︰    下!我早啲出聲!一路都係惠康職員問我哋有冇儲積分架喎!
收銀︰你講嘅可能係其他惠康,我哋唔知,我哋哩間係唔會問嘅!
我︰    唔會問?我今日第一次見你係度收銀,之前日日朝早係度收銀嗰個瘦瘦嘅女仔,次次都有問人有冇八達通儲分架喎!
收銀︰邊個呀?嗰個女仔,我唔知佢啦,總之我哋哩度係唔會咁樣問客人嘅。你去其他惠康我唔知,但我哋哩度係唔會問嘅!
我︰    咁之前個女仔又問?
收銀︰佢唔啱咯!我哋係唔可以問嘅!!
我︰    下?唔可以問?!!

(我俾佢激到頭出煙!不可理喻的野蠻人!如果唔係趕返工,我一定找當值經理了解清楚!)

各位,話晒我都係客吖!
如果她將︰係呀!你下次記得早啲出聲啦!(重語氣)
改為︰係呀!一時唔記得咗。(普通語氣)

我一定會衝她笑一笑,畢竟一時忘記啪卡儲分係好小的一件事。講真,我點都唔信哩間惠康不可以問或不會問人客需否啪卡儲分,假如真的是客人自己的責任,惠康何來有賠二毫給客人的補救安排呀?她可以將自己本來了小小的疏忽,隨意更改為公司的原則,將事情講成是客人不合理的要求。

不吐不快!講完!我不會因為別人的錯而懲罰自己,但希望不要再遇上這種服務態度。

12 則留言:

Armadillo 說...

我甚少去惠康,硬係覺得冇百佳咁好行。至於惠康點儲分,我就完全唔知嘞。不過喺百佳,收銀員次次都會主動問我有冇積分卡。如果惠康連呢樣都做唔到,咁又點夠人爭呢?至於嗰位惠康收銀員嘅態度就真係有似曾相識嘞,令我諗起三十年前嘅國內,同埋若干年前嘅政府服務。

路漫漫其修遠兮 說...

我都認為那收銀員講大話,怎可能不准問顧客有沒有儲分. 我的舊八達通也在惠康登記了儲分,每次購物收銀員都主動問的.

Coffee 說...

Arm︰
我家附近是大間的惠康,各樣都還好,當然如果是間大百佳就更好。至於返工途經的惠康,是細細間的,今朝嗰個人以為間公司係佢嘅,真係冇佢咁好氣!

Coffee 說...

路︰
我同佢理論,佢冇道理,就搬出類似「我哋係咁架喇!我哋係咁架喇!」來待客,打橫來講!好似風月話嘅一樣,費事同佢一般見識!

Ebenezer 說...

佢補兩毫俾妳當補兩分?

在收入及找續以外私下動用收銀機現金?!呢個動作可大可小,分分鐘炒得架!

Coffee 說...

Eben︰
應該係唔記得叫顧客啪儲分的,要給回二毫給客,該是惠康新規定。

best actor 說...

如果時間許可﹐應同當值經理反映意見。公司請佢唔係為左得罪顧客。
不過趕住返工﹐只好從權。 :o)

Coffee 說...

best actor︰
當然喇!我差點唔理遲到唔遲到,同當值經理反映佢哋啲員工質素太低,後來都忍住算了。

嚴明 說...

嗯... 大多數也會問我有沒有儲分, 我的八達通是可以儲分的, 但我會說沒有, 因爲, 那些分, 對我來講, 完全無用. 之不過, 忘了儲分, 就有兩毫, 那就是個"大" 數目! 也因此, 她犯不着賠妳錢, 這不合邏輯. Anyway, 都是小事, 我就連印花也不會要:)

Coffee 說...

嚴明︰
事情的確小到不得了,但她的服務態度及任意歪曲公司原則,令我唔出聲都唔得!

佛爺 說...

若果顧客係大男人,即刻鬧佢。嘻嘻!

Coffee 說...

佛爺︰
所以俾佢激死咯!

Related Posts Plugin for WordPress, Blogger...