2011年1月28日星期五

你懂得爭取嗎

我們一伙久不久都會去某食堂吃午飯,貪佢近啦,定食二餸飯夠唔貴啦。在食堂負責收錢的老闆很好笑口的,總趁收錢找錢的丁點空檔,同人客聊上幾句,還頗逗趣呢!不過果個負責分餸嘅女職員,就太另類了,成天都只見她黑黑冷冷地掛著一張瘦臉,就好像她在把守著甚麼似的,誰也別想在她手裏撈到半點油水。不過,黑冷瘦也有對人開恩的時候,除了異性相吸,還要看你是不是靚仔了。她試過給三樣餸給靚仔甲,亦試過給堆到成座山一樣高的餸給靚仔乙,看甲、乙二張臭美臉神,好像黑冷瘦是港男評判一樣!所以說嘛,女人,就愛製造事端,這黑冷瘦也不例外。

話說今日午飯時(下刪一百字)......C要的二樣餸,其中一樣很少,得二根瘦削到幾乎冇肉的排骨。C即刻開聲抗議,因為這排骨製法是C喜歡的,但黑冷瘦完全當聽唔到。哈!之後尾隨而來的靚仔乙,叫了同C一樣的二餸,排骨的份量嘛,幾乎係C的二倍!估唔到,估唔到!瘦瘦弱弱的C,捧起自己碟飯,走返去黑冷瘦面前,說,點解我同事的排骨比我嘅多咁多架?(用手比劃著份量)
我們望見黑冷瘦發出很凌厲的目光,阿河粉望著我說,嘩,俾我就唔夠膽喇!
我話我都唔敢!(鵪鶉一族)

C取多了排骨回來,我們話剛才見黑冷瘦目光好凌厲喎!C淡然說,你哋見唔到我嘅,可能我嘅目光仲凌厲咯!

#  #  #  #  #  #

這樣,我想起親友告訴我的一件事。在廣東某城,有一黃姓家庭,母親離世二年多,二個大女兒外嫁他方了,兒子另有家庭,中過風的七十多歲老爸靠一住家幫傭照顧起居,獨守老屋。一天,隔壁張家說要擴建後院廁所,情商想跨建過來黃家後院空置了的雜物房,黃老父覺得冇所謂,同意張家改建過來自家後院少少,具體唔知幾多。點知之後黃家兒子回來看到,即刻要求對方拆掉超越過來的部分。但如果要拆,張家已完工的新廁房則要大執過,所以不肯拆,稱是得到黃老父首肯的,而間屋係屬於黃老父的。一場爭吵開始了......最後,黃家兒子站在二樓後平台上,理直氣壯嚷道,國家之間在領土上都是寸土必爭,你睇睇你家跨過來我家多少寸喇?再不拆,他拆!

12 則留言:

Armadillo 說...

其實C君得閒可以去做吓美容,兼夾做埋健身,咁咪自動有餸加囉,又唔使傷和氣。至於第二單,我就覺得個仔橫蠻咗嘞,人地係得到佢老豆同意先開工,而家又要人拆,分明係玩人啦。

Coffee 說...

Arm︰
c君係瘦弱女生來架!
仲有,你係靚仔一族,一定都係黑冷瘦嘅心頭愛,哼!你梗係唔知我哋嘅苦啦~~

至於第二單,個仔話啲人明知佢老父中過風,神志唔清,係明呃佢老父喎!

卡臣 說...

據理力爭...睇吓對方乜嘢料/黑唔黑 先?

Coffee 說...

卡臣︰
內地嘅嘢,講唔清呀,總之最後好似係拆咗了。

l.minor 說...

第一單...如果分餸的那個是男人,見到妳可能次次又分得多過你班靚仔男同事呢!

以前讀書去做part time,有幸(還是不幸)做分餸的工作,有位拍擋(也是我的同學)叫我分餸時要分多一點給人,他說用咁嘅價錢買飯盒,分鬼咁小俾人,試問你會點?當然我照聽,但他又跟著說,有時你收到一個飯盒,比其他超巨型,你也不要開心住,因為可能是跌了落地放回來的...

Coffee 說...

Minor︰
分少啲都好架,食少啲,怕越來越肥:p

如果我去做分餸嘅,見到靚仔可能都會分多啲俾佢,哈哈!

S 說...

呢個世界就係咁,我覺得阿C的做法冇問題,不過要睇吓爭取緊的係乜野,如果樣樣都係咁,就算得到的高,自己都好辛苦!

另外果單,和現實中的豪門爭產有點異曲同工之相似!

Armadillo 說...

首先,你都冇講明話C君係女生!至於第二單,中過風都唔係一定會神智不清架。如果真係,咁個鄰居就唔啱喇!哈哈,令我諗起賭王添!仲有,靚仔一族?就算係都已經九十幾年前嘅事啦,舊夢不需記呀!

Coffee 說...

SKII︰
我認同你講嘅,睇下爭取嘅係咩?爭取多一塊排骨,我唔敢或者應是唔會,但我試過大庭廣眾下爭取公道,嗯,遲下寫篇。

Coffee 說...

Arm︰
咁,我亦都冇講過個C係男生喎:P 嘿嘿!
第二單呢,我識果個黃家,我先先都認為黃子太橫蠻,但後來他講到寸土必爭,我啞然了!
靚仔係九十幾年前的事?下次貼張近照吖:)

Armadillo 說...

我1月20號嗰篇「懶得我騰騰震」裏面捧住舊冰嗰張相係兩年半前影架,唔知算唔算近呢?

Coffee 說...

嘩!兩年半前,當然係近照啦!所以,你已被編入靚人一族,編號~2011130~嗱!你話我有歧視成份都係咁話架喇!

Related Posts Plugin for WordPress, Blogger...