2011年1月11日星期二

又是痕癢發作時

天冷下來了,皮膚開始十年來樂此不疲的痕癢攻勢,用上我的甘油獨門秘方,效果很好,但總有失守的時候,例如天光時背脊、雙腿在被褥裏暖到發熱時,自不然又痕癢起來,逼住提前瞓醒,明明我很好瞓架嘛!這都算不上甚麼,放工時搭的地鐡最熱,熱得叫人想罵娘!身上厚厚冬衣,脫下來嘛,加埋手袋或仲有環保袋,就會成手都係東西,所以我都觀察到大部份人都似我一樣,忍掛!本來熱不是問題,就算大熱天我都是最多怕曬,不會怕熱,但冬天一焗熱就死得!身體發熱皮膚就痕,在地鐡車廂皮膚痕癢,仲要係主攻背脊bra帶對上的位置,真係誰人娘親的!熱得我滿臉通紅,又不能盡情搲下而後快。

隔離左右如出一徹的冬衣大灰熊,最好大家都坐著別動,站著別動,你郁身郁勢我實鄙視你!見到我不夠友善的目光,梗係啦!冬天香港地鐡又熱又焗,透唔到氣!

16 則留言:

Ebenezer 說...

帶定支不求人出街會唔會有幫助呢?

卡臣 說...

日本地鐵的暖氣仲熱呀!我怕怕!

Coffee n Tea 說...

Eben︰

呢條問題的引伸性太廣泛,pass!哈哈!

Coffee n Tea 說...

卡臣︰

香港人習慣冷氣,唔慣暖氣:p

laulong 說...

我想揾件差事,在地鐵專幫靚女搲痕 ^^

l.minor 說...

妳是女的還好,男的一動,就給人當色狼

Coffee n Tea 說...

校長︰

嘩!幾時都係你有創意,哈哈~

minor︰

>>男的一動,就給人當色狼

咁嚴重!你有類似經驗呀(講笑)!

SKII 說...

最衰唔著定多啲的話,出到街又凍!我比你好少少,大部份時間搭巴士,凍多過熱,唔會好似搭地鐵咁煩。

Coffee n Tea 說...

SKII︰

唔係講笑,出地鐡時凍到飛起。有得揀時,我會選擇搭巴士。

PoCaRi 說...

真係唔講得笑, 而家D巴士一D風都唔開, 仲慘過以前有巴士可以開窗既日子. 呢個冇風都唔係問題, 最慘係果D 粉皮坐後面既係咁打乞痴,前面條友又係咁咳,真係唔得佢死, 有風都可以吹走"佢", 冇風就真係食到應一應呀!!

所以我好憎架巴士冇風(即係想同新巴/城巴投訴!!)

我建議你, 最好搭地鐵唔好坐,唔係痕得黎都冇得搲, 最好係企係卡與卡之間D位, 就算隔住件衫都可以擦背脊止痕呀~~ XDD

佛爺 說...

皮膚癢係咪太乾燥?

Coffee n Tea 說...

Poca︰

係架喇!我都超憎附近的人打乞痴呀咳呀唔掩口,係唔掩口果啲!佢唔掩口我真係心生厭惡眼露鄙視!
>>擦背脊止痕!
哈哈!謝你好意,但我唔敢的,會死忍!:p

佛爺︰

好明顯係架!我沐浴後搽下嘢就冇事,但一焗熱就唔得,加上我怕凍,著衫又多!:p

嚴明 說...

真是感同身受!我自小有敏感皮膚,年輕時問題也不大,但現在年老了,免疫系統就開始造反了. 特別説說那bra 帶位置,皮膚很容易對塑料敏感,就像内褲頂部内藏的膠圈,也令我特別痕癢:P

Coffee n Tea 說...

嚴明︰

原來係咁!你將甘油加落潤膚露一起搽吖,好得架!

笑談風月 說...

飲蜜糖有幫助舒緩症狀。
我眼疾早已沒事,近日換新電腦,要重新適應,尤其手寫板玩抗議,乘機偷懶不更新網誌。

Coffee n Tea 說...

風月︰

謝謝你!蜜糖水間中都有飲,大部份時間都冇乜嘢,係有時會特別痕癢!

你眼冇事就好!

Related Posts Plugin for WordPress, Blogger...