2011年1月27日星期四

非黑色沒朋友

我越來越不耐煩香港人在冬天所穿衣服的顏色,黑色主打,灰、藍其次。打開你衣櫃望下,是否黑灰、藍灰等深沉色居多?望下你週圍,包括上下班途中所見,包括你的親友、同事,是否黑沉色為主流?昨天放工我望下地鐡車廂,九成以上係黑,或灰黑,連兩個三、四歲的小朋友,都是一個穿黑色一個穿藍色的羽綿褸。真沒勁!連少兒的如花似錦都給沒殺了。

我的衣櫃是否黑色當道?當然不是,皆因我好色嘛!嘻嘻!我會買不同顏色的衣服,有些顏色美得是當初買時就沒打算多穿的,只是很想讓這些美麗的顏色進駐我的衣櫥罷了。所以我的衣服,閒閒地跟我十年八載,不單是因為我長情,也因為不忍捨去那各種漂亮的顏色。那麼我又是否抗拒黑色呢?當然不是喔,出得來行,怎可以沒有些黑色「戰衣」傍身呢!

講返呢個星期一,我放工後有事要往將軍澳坑口,點知一出地鐡車廂,對面黑壓壓而來的人群中,我發現一略高個子帶著熟悉的面孔,冇眼花吖嘛!睇真啲,真是頂爺!據我所知,他不是住將軍澳區架喎,即係同我一樣來坑口辦事啦。嘩!我好唔想俾佢見到我咯,本人不喜歡應酬是其一,最重要係阿頂爺可能冇預到會在坑口撞見熟人吖嘛!萬一要殺我滅口就唔好啦!於是我即刻左右找人頭作掩護,同埋,我好慶幸我當時穿了件黑色格子褸,前後左右大家黑埋一堆,打成一片,佢見我唔到!佢見我唔到!嘿嘿~ 只見頂爺三步並作二步,大踏步朝某一方向隱去,我才施施然辦我的事去也。原來黑色除了隱陣,不容易出錯,還可作掩護呢!

28 則留言:

卡臣 說...

我的衣服都是深沉果類...人老啦嘛

Armadillo 說...

哈哈,咁嗰爭落人地周身債嘅就要學吓喇!話時話,我呢幾年買親衫都只係揀深沉嘅顏色,一來冇咁易污糟,不過主要都係唔好意思著得太鮮色。

篤篤篤撐 說...

我早前寫過, 香港人唔鐘意表達自己既身體ma, 著黑衫, 亦是同一道理

Coffee n Tea 說...

卡臣︰
試下多少少色彩嘛,再唔係,男生加條sharp少少的圍巾都唔錯架!

Coffee n Tea 說...

Arm︰
同年齡冇關係架!你睇而家啲口靚仔,一樣偏向黑黑沉沉,型喎?!
你試下間中著唔同色彩的衫吖,或者感覺良好呢!

Coffee n Tea 說...

篤撐︰
嗯!我很喜歡你這句
>>香港人唔鐘意表達自己既身體!

對呀!大家都怕標奇立異,找到大同以策安全,一眼望去,好像香港人穿著制服一樣:p

我想睇你果篇,可否send條link來俾我?:)

火鶴 說...

李家鼎?

Coffee n Tea 說...

火鶴︰
哈哈!唔係呀!係頂頭上司咋:)

l.minor 說...

黑色易襯衫,而且有保護色作用呀!

Coffee n Tea 說...

minor︰
咁你係咪覺得著住黑色,個心定好多呀,睇來你已不是黑色保護地帶的入門級了!~~

Hana 說...

我...我哩幾日日日黑色(汗)

篤篤篤撐 說...

COFFE,

係8月時既遊戲文章:
http://doodoodoochang.blogspot.com/2010/08/blog-post_05.html

http://doodoodoochang.blogspot.com/2010/08/blog-post_06.html

laulong 說...

呵呵,見老頂於異地,小心!

Coffee n Tea 說...

Hana︰
你以車代步,見唔到成車廂的黑藍灰咋!

Coffee n Tea 說...

篤撐︰
剛睇了,香港普遍女生著衫都係包到極高,包括在下:P 嗯,我反而唔係覺得睇蝕,更不想被人注視,勁唔鐘意啲三九唔識七的人望住。香港人多,返工上街時很多時候都要和陌生人近距離站在一起,所以選擇低調些。
但某程度我都很同意你的>>自我形象係由人地建構!港女生的確很多不夠個人風格,不夠自信。

Coffee n Tea 說...

校長︰
當然啦!所以我即刻龜縮,並幾慶幸著了件黑色格子褸,身陷保護色中。

( 話時話,校長,你的下屬遠遠見到你,可能都係一樣龜縮了:P )

SKII 說...

哎呀,我早兩日都係想寫黑色,因為近年盡少買黑,點知果日朝早換完衫發現竟然係全身黑,預備穿的長靴亦是,於是臨急臨忙打開衣櫃,竟然找到一件幾年前買的紫色 top,今年最興,啱啱好,即係換!

Kiki 說...

想起早前去買衫, 我媽陪我去, 我話要買件紫色衫, 同佢拗左幾耐佢先放棄反對立場......結果依家我最常著的便是那件紫色衫.

嚴明 說...

我也挺反感穿黑色,我認爲,只有在沒選擇的情況下,才穿黑色。不過,何謂有選擇? 到服裝店去看看,他們有提供選擇嗎? 有,是春裝,可以在冬天穿春裝嗎? 不是顏色問題,而是保暖問題。沒勁。

Ebenezer 說...

以前在會計師樓做時,公司係有教過點去著衫嘅,記得如果唔係casual的話,只可以著黑灰籃,唔知係唔係呢個原因,通街d番工衫都係黑灰籃呢?

Coffee n Tea 說...

SKII︰
我好怕冬天襯衫,幾廿百樣嘢:p

Coffee n Tea 說...

KK︰
Nice to see u here!
給生活添點色彩,好!

Coffee n Tea 說...

嚴明︰
係呀!冬天買衫,個salse見我睇紅色或紫紅色的褸,間間個salse都一定講,就來過年喇,買年紅色褸過年喇!我心就諗,真不懂做生意!

Coffee n Tea 說...

Eben︰
係喇!係喇!我想講嘅就係呢樣,大家都好似穿了制服一樣,黑沉沉,沒有朝氣!
黑色的呢子大衣穿得人很神氣,但黑灰的鹹菜綿衣則另當別論嘛!

PoCaRi 說...

下? 全黑/灰?? 我真係接受唔到, 搞到返工好似去大酒店咁~~點都要有D 色呀/pattern呀/暗花撞下先得黎型架嘛~

最怕係街見到黑衣人, 你講得岩呀, 而家好多女人都係黑色衫+裙+絲襪+鞋, 真係好有保護色, 直頭唔覺佢存在呀~夜晚見到仲以為見鬼~

Coffee 說...

Pocari︰
很多人是真心喜歡黑色,但黑色其實很蝦人著,要著得出色唔容易。對,要有些其他色撞下,或加條圍巾,個look會好好多!

DeepC 說...

我都有黑色衫, 但量少.

其實穿黑色衫好易穿得型, 但同時也可給人cool的感覺. 在生活或office生態, cool未必一定是件好事. ^^

Coffee 說...

DeepC︰

好有心呀,搵到呢篇:)

黑色還好易襯,呢樣係事實,尤其冬天嘅褸,超八達。

Related Posts Plugin for WordPress, Blogger...