敏感話題

去化妝品店買bodylotion，相熟sales熱情招呼，她向我推銷千多元一盒五支裝的「時光倒流」，有買二送一優惠。我輕笑，妳真係睇得起我，我都想時光在我的臉上倒流，但我無錢，我笑說我剩係來買bodylotion架。這時來了個少婦，說是熟客，旋即買四送二，我咋舌！我遠遠瞄到有個sales雙手在自己胸部前比劃著，好奇問下，哦，原來除咗按搽在面上，還可用在胸部，即在胸部上方，沿著韌帶向上按摩，每日堅持，可令雙乳堅挺些不易下垂，噢！相熟sales細聲八卦話那少婦剛生完第三個BB，她用開的。我做了個鬼臉，相熟sales說唔貴架喇，去美容院俾人推要幾多幾多錢呀，且去美容院始終要經人哋嘅手，可能唔慣，自己按下幾方便呀，最緊要係可以幫妳keep得靚啲喎，聽到此，我忍不住笑出了聲。我快快買了我的bodylotion，走人。

想起在MB做facial時，有纖體師來推銷美胸套餐，稱可令胸部大些，型態靚些，我睡在做facial的床上，全身蓋著毛毯，說，我知我唔係好大，不過我OK架喇，夠架喇。纖體師仍不放棄，說，大啲著衫靚啲，而且唔係剩係大啲，可以幫妳推到個胸嘅線條好靚，女人個胸好重要架，我哋有好多客初初都係試試下，一試先知好work咯，甚至有媽咪試過好，跟住再帶埋個女來推，推到好靚，妳放心喎，我哋好專業嘅，只係推胸部外圈，唔會掂到妳胸部中間果渡...為了不浪費纖體師的時間，我說了真心說話︰我其實唔中意咁大！然後纖體師沒趣地離開了。

哈哈哈...行在途中的我，心中在發笑！香港人一天到晚都要面對推銷。