2010年9月30日星期四

曾是筆癡

近日大執屋,唔執唔知原來積下的雜物是如此之多。我邊執邊扔掉早已不合用的林林總總,當初不捨得棄置的,在冷宮靜候多年,如今即使重見天日,始終難逃被淘汰的命運。房子就是這麼大,怎能無止境地容納日漸增加的物品。靜心翻弄執拾舊物,我不覺得辛苦,相反,於我是一種享受。三、五年前,甚至十多年前留下的東西,看在眼裏,往事重溫了,很多忘記了的,又記起。拾起,放下,終於棄掉,咁多年都得物無所用,還要留出空間來存放,封晒塵,最後還令人居住的空間少了。

以下這些是筆,多到真得令人難以置信!言是早產B,手腳唔係好夠力,由小二起讓言學鋼琴,為的就是要他練手指力。手指唔夠力,抓筆寫字好快手攰,然後手乏力下唔肯寫字。為氹言抓筆,我去買來唔同花樣的鉛筆,以引起言的興趣。果然有效,言肯抓筆寫字了,刨好一堆筆,他寫幾隻字又換一支筆,或者寫第二個句子又換另一支筆,如此做一次的功課,不斷轉換鉛筆,幾乎整個小學階段都這麼的樂此不疲。

這方法在幫助言抓筆寫字係起過一定作用,但負作用是言迷上了買不同的筆。由最初的鉛筆到其後的鉛芯筆,再到原子筆,及當年所出的所有大口仔筆(言曾是大口仔迷),都是言的心頭好。可能你哋會問言點有咁多錢買,言當然冇,但每次他行為好(言很跳皮)或成績好時,筆是他要求的獎品,然後家中長輩給他的零錢,他惟一捨得用來買筆,他買過最貴的一支是一百多元一支!這是在言剛升讀中一時的事,知道再不阻止就會壞事了。以往一般小孩子有的物品,都會買給言,於是改變方法,出零用金給言,讓他儲錢買想要的東西,最多作少少資助。言辛苦儲錢買了部PSP,期間他明白了過往幾十元買一支筆真不值!

這是言放在書枱使用中的筆

  這是言書枱抽屜裏的筆

  這堆犀利喇!由言小一起如沒有壞就留起的筆,因起初控制唔到言停買筆,我一氣之下大沒收,只留下五支給言用。今晚執拾時攞出來重見天日。

 這堆都是當時沒收的,有的已壞,有的墨已乾涸,反正是寫不到字的。影完這張相,跟手棄置了。

PS︰言見到這些筆,他曾萬分著迷的筆,但已無動於衷了,所以仍是由我用盒子裝好,我戲言︰讀到大學都唔使買筆了!

12 則留言:

SKII 說...

嘩!真係好多。

Armadillo 說...

係呀,我屋企都有好多濕濕碎碎而且已經唔再用嘅舊,不過越係舊嘅就越唔捨得掉。有時摷返出嚟睇吓,就會記起某人或者某事。如果掉咗,我驚會連嗰記憶都冇埋。

Coffee n Tea 說...

SKII︰

如果再計埋中途爛咗掉咗果啲,真係不得了!

Coffee n Tea 說...

Arm︰

我都係個好念舊的人,你講得啱架,有啲嘢越舊越唔捨得掉,所以我逢執嘢都執好耐,一邊執一邊重溫下,然後就優先篩選方式來留啲棄啲。

佛爺 說...

我很少用筆了,幾乎被電腦的鍵盤取代了。

Coffee n Tea 說...

佛爺︰

我都係,打字好地地,一轉手寫,有時諗好耐先記番一些識嘅字點寫。:p

Ebenezer 說...

我都有儲筆的習慣,不過大部份都是 Parker.

荒木茂 說...

haha,我屋企都好多筆....真係一世都用唔完。

Coffee n Tea 說...

Eben︰

Parker貴好多!睇來你喜歡寫字喎!

Coffee n Tea 說...

荒木︰

哈!我本身都喜歡筆架,不過電腦的興起,而家真係少咗用筆寫字,啲筆可用好耐呀!

笑談風月 說...

不是開玩笑的多,有些放得太久,墨會乾掉!

Coffee n Tea 說...

風月︰

可想而知之前我幾經辛苦才戒了他舖買筆癮!

Related Posts Plugin for WordPress, Blogger...