頭腦發熱

和菜遠小姐坐二對面，每日相對的時間甚多，互相見證了對方常進食零食。一日，有感於嘴饞令身型有向橫擴充的勢頭，於是不知是誰先提議，不如自訂方案進行減肥大計，二人互相監督，只吃正餐，戒掉一大堆不知所謂的零食。二人一拍即合，雄心壯志，非得將食零食的壞習慣戒掉。

菜遠即場制定了一張一個月的進度表，預備好一個公仔印章，每日分三個時段蓋印仔。咖啡相對理性啲，說，完全無零食，忍得太辛苦，反而容易放棄喎，我有二樣零食唔戒，就係朱古力和芝士cake，我俾自己每日有二粒朱古力，一星期有一次芝士cake。菜遠諗下亦跟，每日給自己二次零食機會，份量盡小。

於是，我們開始了第一日的滅絕零食大戰，這日二人表現非常良好，中途你眼望我眼，然後相視而笑，好像表示︰我做得到！收工前，咖啡開心地看著菜遠認真地蓋印仔。第二日，上午無事，午飯過後，咖啡拉開零食櫃，食了二粒朱古力，之後都無破戒，但就起碼拉開零食櫃看了五次自己那些心愛的零食，忍不住告訴菜遠，我睇咗五次自己個零食櫃，點知菜遠說，嘿，我都睇咗自己個零食櫃好多次。

到了第三日下午，咖啡宣佈放棄，原因是常諗住要戒零食，反而就更整天諗住零食，滿腦子都諗住零食，仲更想食。菜遠不屑咖啡之說，獨自上路，但終於勉強苦撐多一日半，亦無聲放棄了。一個月的進度表只蓋了三日印仔，一場原本係威係勢的轟轟烈烈的減肥大計，就此無疾而終。