O曬嘴！

今日有同事提議聖誕節再玩交換禮物，我第一個反應係︰吓！唔好啦掛！但這位同事咬住唔放︰玩啦，最多今次唔買$50的東西，買$20的。我失笑並附上一更大聲的︰吓！我望下其他同事，好似無聽見剛才的對白一樣，木無表情，於是我知大勢已定︰唔反對即是同意(我們的地方文化)。

午飯時，我向其他同事轉告聖誕節交換禮物的提議，當我說出禮物價格是$20時，一男同事「吓」得仲大聲，如果唔係隔離有車經過，肯定方圓唔知幾多......米都聽見。然後有人強烈要求加碼，經過我們一行今日有緣共聚午膳的五人商議，決定順應部分民意，加碼到$25-30，睇你死未！大事決定了，我加多樣提議︰不如果日交換完禮物後，我哋玩鋤弟呀？
點知一同事驚呼︰乜你講嘢咁粗老架？
我O曬︰吓！唔講得架？
同事︰女同事應斯文啲，講玩啤牌或者鋤大弟。
我O曬嘴！無從考證，好無奈。

仍是在行去那間茶餐廳途中，我話果間茶餐廳啲食物都幾好味，不過我宜家唔想飲咁多咖啡奶茶喇，一同事跟口說︰你可以飲湯架。我話︰我係想飲湯，但果間店嘅湯有樣唔好，餐餐都係煲合掌瓜。另一同事接口︰嘩，我哋都唔係成日去果間呀，咁你都留意到佢哋餐餐煲合掌瓜？

入到餐廳坐下，我問侍應︰今日咩湯呀？侍應︰合掌瓜煲豬展。全部掩嘴偷笑，我就一臉洋洋得意，侍應就滿臉疑惑。