認真

自從沙士以來，一有甚麼流感之類的風吹草動，全港中小學劃一實施學生上學前要量過體溫，沒有發燒才可上學。剛剛開始時，大部分家長嚴格執行，親自為仔女量度或仔女自己量度後，家長都一定要過目探熱針上的數目字，如果是水銀探熱針，還要轉上半天去研讀上方的刻記，然後簽名作實。看似簡單的事情，但當每日都要做時，就不是這樣說了，加上早上趕時間便容易忘記，但唔探熱又唔得，試多二次回到學校交不出體溫紙，老師會寫手冊通知家長要跟進，甚至打電話督促家長，這樣一來，家長就煞有介事了。

其實小孩無病時體溫日日都差不多，每朝返工的返學的都滾水「六」腳，有人便想出前一晚預先探好體溫的辦法，又有人早上來不及探體溫，索性就擅自寫個正常體溫上去，然後簽番個名搞掂，至緊要唔好無體溫紙交。記得有個舊同事，女兒讀油麻地一小學，有日老師致電︰"xx媽咪，你寫36.8度寫咗成個星期喇！"舊同事收線後復說番，並說︰「又會睇得咁仔細嘅！」，她一番話笑死我們了，咁失策呀，xx媽咪！

本來，為何不可一星期都係36.8度呢？就係探到這度數吖麻！但舊同事啞口無言，因36.8度的確是她作出來的，所以她一時之間唔知點答，而老師識穿了，亦可能這是一部分在職媽咪的「疏漏」，所以畫公仔不畫出腸地暗示這小撮家長︰唔該作都作得合理些喇！

家長收到啦，今日36.8度，明日記住寫36.6度或37度！

前一段時間，在社交網站FB見到一群組︰我很討厭每日朝早要作體溫、冒簽名上學！一看到已失笑。這是由學生發起的，我粗略看過一下，已有大批學生加入此群組。

其實，小孩子如作病，好易看出，平日生龍活虎的，一到病時，攤係張梳化度死下死下，甚麼好食的好玩的一概眼尾都不瞄下，這時，就一定要認真探熱喇，而且是一日要探多幾次呢。