2013年3月24日星期日

疼痛難當

星期六無事,即興打去MB預約按Body,剛巧有客人取消了Booking,於是我便攝了位。嘩,今日的Body師我早聞其大名,素來是客人指定的熱門人選,因我極少指定要哪位Body師,所以之前從未遇上。這位Body師果然不同於一般的,一下手我已覺痛,礙於面子不好叫出來,但好快已顧不了這許多,頻頻呼痛,她按到哪我「典」到哪,按到手腳時,我是痛到要縮手縮腳,不過被她捉實了,痛到越嗌越大聲,幸好每個房間都隔音的。

Body師說我太長時間沒來了,明顯身體周身積實,才會疼痛難當,待她按過了便不會痛,之後會整個人輕鬆了,果然如是,所以伏在那張牀上如受刑般捱了一個半小時,算是值得啦。

去了MB這些年,今日是第一次有Body師告訴我,按完Body後不要即刻洗頭沐浴,因為血液運行快,全身毛孔張開,尤其頭部不宜即刻沖水,建議最好四小時之後才洗頭沐浴,連蒸氣都不宜,要就乾蒸。我聽了覺得有道理,不洗頭沖涼,去乾蒸了十五分鐘,中途睡著了一會兒,醒來時覺得其實乾蒸睡著有點危險,因臉部不能如此受熱,我用大毛巾由頭蓋下遮住臉部,所以呼吸緊促得有點缺氧的感覺。

剛才洗澡時見雙臂上有幾處微瘀痕。

又,整整經過四天才攻下Candy的三百一十一關,有點心力交瘁!


10 則留言:

ep 說...

真是異於常人, 乾蒸的時間通常不會長, 溫度又高, 竟能睡着. 我覺得做按摩有慣性的, 就像按摩師所說, 有做開的忽然很長時間沒做, 肌肉會發硬, 除非經常有做舒展筋骨的運動. 人不能缺少運動, 自己運動會辛苦一點, 享受別人給你按摩其實是一種被動的運動.

CC 說...

按摩時按摩師常叫我放鬆身體, 我總不能放鬆, 尤其被按得痛時. 你很利害!!!! 乾蒸完不用洗澡??

Ebenezer 說...

妳在香港做按摩?同羅湖城d有咩唔同?

DeepC 說...

我玩過一次半次焗桑拿, 熱到唔知點咁, 坐了兩三分鐘受不了就離開了; 你可以坐十幾分鐘, 而且還睡得著, 犀利! (但好似有點危險, 不知醒就大件事. )

Ebenezer 說...

曾經入桑拿房,腦裏忽然幻想條友入去之後瞓咗,醒返後發現身體其中一忽焗熟咗,仲鬼咁香添!

Coffee 說...

ep︰

我係面唔受得熱,掩住面就OK,我都係第一次焗桑拿瞌著咗,可能近日太攰了。

Coffee 說...

CC︰

我都唔知點解咁多人客MARK呢位BODY師,佢話佢一啲都唔大力咯!

冇沖呀,我素來沒甚麼汗出,焗十五分鐘都只係出少少汗。

Coffee 說...

Eben︰

咁你要先話俾我知羅湖係點嘅才有得比較,嘻嘻。

Coffee 說...

DeepC︰

我第一個反應就係,嘩,好危險下!

有啲桑拿房的溫度調較得高,我都試過入去三分鐘就要即刻出來。MB的不是很高溫,我見其他人都是閒閒地焗十多分鐘的。

Coffee 說...

Eben︰

哈,我覆你時你又留緊言,MB的桑拿不是很高溫的。

Related Posts Plugin for WordPress, Blogger...