2012年11月21日星期三

損友

(以下是三位在工作中建立了信任的同事的一則平常對話,內容反智兼有教壞細路之嫌,閣下如向來為人一絲不苛,視插科打諢為市井無賴之物,那麼,回頭是岸!)

肥力一定憋壞了,一直要等到我和菜菜子都稍為空閒的時候才爆炸。說今早坐巴士上班時,感覺到旁邊有位阿叔眼望望佢,起初,向來自認極靚仔的肥力以為真係有人欣賞佢夠靚仔,殊不知十多分鐘後,阿叔嬲爆爆開聲︰你部電話唔好挨近我啦!你知唔知有好多幅射架!肥力說完,等聽我同菜菜子的反應。

我︰唉吔,今朝忙得滯,一路未得閒上 You tube 添!今日熱片係咪巴士阿叔重出江湖大戰四眼哥哥呀?
菜︰你有無叫佢返歸呀?
我︰你有無叫佢人多嘅地方唔好去呀?
菜︰係有人嘅地方都唔好去,你有無問佢係咪住係山卡啦?
我︰你有無問佢係咪全家都唔用手提電話呀?
菜︰你有無提佢出街要著全套防幅射裝備呀?包括帶防幅射眼罩!
我︰巴士上有幾多部手機對住你哋影呀?

肥︰想點呀?你兩條友!

菜︰你有無話佢知地球就來要爆炸,快啲逃走!
我︰好啦!好啦!正經,你當時有咩反應呀?
肥︰我真係俾佢 XX!妖,心諗,咁怕幅射,搭的士啦!
我︰咁你有無講呀?
肥︰梗係無啦!
菜︰咁你咩反應都無呀?
我︰照繼續玩手機?
肥︰當然繼續玩,不過就擰歪少少個身咯!
菜︰係我就唔擰,繼續玩,甚至再舉高啲部手機!
我︰要擰都係阿叔擰開個身啦,不過可能擰去邊都有部手機對住佢!(笑)

肥︰笨咗添,聽完你兩條友先知自己咁厚道!


&  &  &  &

三人各自在位竊笑。





8 則留言:

卡臣 說...

我的朋友也是充滿娛樂性

Coffee 說...

卡臣︰

人生苦短嘛:)

佛爺 說...

美國有不少女人,把手機放在胸圍裡,貪方便。現在出現數個乳癌病例,位置竟然在她們習慣放智能手機的部位,專家呼籲女生不要把手機貼乳,雖然無法確定是否有關。

阿叔坐咁遠都驚,簡直離譜。

Coffee 說...

佛爺︰

間中都有見報導指出手機幅射對人的傷害,係應該玩少啲嘅。

如果個個用,阿叔自己唔用,避免唔到架!

DeepC 說...

嗰位先生唔洗驚啦, 係驚得無用,
香港是世界top 10人口密度高的地方, 市民擁有手機率係全球最高, 好似平均每人有兩部可用手機, 計埋全城wifi 及四週電子用品和天線接收及發射裝置, 基本上是避無可避.

Coffee 說...

DeepC︰

絕對係啦!所以同事有唔順氣,因為呢個問題唔係同事一個人的問題,阿叔好似攞佢出氣一樣。

DeepC 說...

有些人比較神經質, 也會使附近的人不舒服.
你同事不用介意囉, 有你們一班好同事在, 應該幾 happy.

Coffee 說...

DeepC︰

我哋係好開心的一群:)

Related Posts Plugin for WordPress, Blogger...