2012年4月14日星期六

我又講

今日追看番《盛女》,唔知點解,我常常對呢類節目有做假的感覺,講真呀,搵唔到男人,嫁唔出,今時今日唔係好大件事啫,但要係七百萬人面前亮相兼亮底,就真係好大件事咯!出得嚟「行」哩五位「佳麗」,心理質素想必一定奇佳,但觀乎又不然。那麼真是做媒的嗎?嗨,就算做媒都要有莫大的勇氣架,七百萬人喎!難道是盲點,你驚佢唔驚,假如這是真的。

Bonnie 說︰我冇樣、冇身材、冇錢、冇事業、冇建立出個人特長、冇...一句講晒比無產階級更一窮二白,咁咪即係負資產邊緣? 哩樣直情係個人盲點啦!二十九歲人都未醒覺。

而  Florence 就很自相矛盾,佢在追求有愛情感覺的婚姻時,希望對方完全接受佢就係佢,如果對方是咁介意她的外表 ( 素顏 ,不可觀 )和年齡 ( 三十九 ),那他不是她要搵的咯!但在安排了她和一大學 ( 印象中 ) 教書的相見後,她對男方諸多挑剔的又正正是外表、年齡,甚至職業!完全凍結咗佢了解認識對方的意欲,她說覺得對方外表大佢好多,又說希望搵個有學識,樣樣都識啲,但估唔到真係搵個做教師嗰咯! 唉,咪話我黑心,繼續孤身走你路罷!

不論男女,問世間,有幾多個真係天生麗質吖?生得不漂亮,但要活得漂亮,外表是上天給的,性情內涵可以後天培育。可能有人會說,如果你冇外在美,又或者對你的外表提不起興趣,對唔住,我實在冇興趣去發掘你有咩內在美。當然,不是說真的生得很樣衰那些,太不濟的話,我讚同請教醫生如何後天補救。

記得以前,有個女同學,在一班女朋友中屬普通一個人,但奇怪的是男同學至後來的男性友人總是對她較有興趣,令一眾女友人生出妒意。何解?後來大家都發現,因為那位女同學本身很活潑開朗,很愛笑,不記那些小家子仇,該體貼人時又毫不含糊,總是帶來輕鬆開心的感覺。

又記起有一男友人在初結識了一位女生時,同我講想追她,我問他她是怎樣的人?合適他嗎?他說她很喜歡小孩子,並給我看她 FB 的相,一張抱著 BB 的相。我問一開始識她時就是這張相嗎?他說不是,後來換上的。我知這位男友人是很想結婚生仔的,心水清的我當然明白那女生在刻意經營,不過我厚道,沒有道破。我笑了,說如果她有心,你咪試下咯!我心下認為在剛相識就如此刻意,不是好事,果然很快分手收場。但人生有些彎路是免不了每個人都要自己行的。

所以女生呀,如果你真係想搵男人,請先找出自己,好冇!

18 則留言:

尹思騰Instant 說...

悄悄告訴你,真是做假的。裏面有幾個男人都是我的朋友。

阿貓 說...

原來其中的瘦女子是我老公同事認識的,自身故事也是真的,其他的真假就不得而知。

卡臣 說...

結婚是唯一出路,TVB想灌輸的價值觀

攞你命三千 說...

除左S外,d女士連心態都未開放
咁都搵到伴我切!!

Coffee 說...

思騰︰

吓!咁我估係嗰幾個教人如何和男人約會的。

Coffee 說...

風月︰

佢真係好瘦,上鏡都瘦成咁,叫佢增下肥啦!

Coffee 說...

卡臣︰

唔知多唔多人有共鳴。

Coffee 說...

三千︰

切蛋糕呀,見者有份。

S 說...

哈哈,我冇睇呀,一來因為我唔係幾睇電視嘅,二來因為我覺得係做假囉!重有,咁啱得咁“蹺”,我今日就係寫自己以前以為天生麗質,算把啦,世上有幾多個真係咁?成年後重唔明又或者唔想明,冇人幫到佢架啦!

DeepC 說...

很有專家的口吻, 哈哈. ^^

Coffee 說...

SKII︰

你麗質天生不怕認喎。

今日睇報紙話 Florence 受多方面批評,好唔開心!死啦,我仲寫埋一份!

Coffee 說...

DeepC︰

咪笑我啦!我其實唔係好識架:P

S 說...

Coffee,係我自己覺得啫,咁樣自我感覺良好啲吖嘛!至於呀 Florence,如果佢的故事和背境係真嘅,有自信的話,有乜好唔開心吖,簡直係多你一個寫唔多啦!佢行得出來被大家睇,就預咗有讚有彈,其實人真係貴乎自知,就算真係比你咁幸運,天生麗質,但外在美始終要比歲月洗禮,太介懷的話,內在美多極都有限啦!寫咗咁多,唔通我都應該寫返一篇? :-P

Coffee 說...

SKII︰

咁你又講得有道理,希望佢有足夠心智啦!

壽頭一塊 (狗鵬) 說...

我又講 你好似 Mei Ling 喎。我講你D內涵同分析。

Coffee 說...

阿鵬︰

我邊有 Mei Ling 咁老 ...




到的經驗喎!

不過,觀乎整個節目,我的確最 buy 嘅就係佢。

壽頭一塊 (狗鵬) 說...

《心水清的我當然明白那女生在刻意經營,不過我厚道,沒有道破。》

Coffee : 你縱橫江湖閱人無數....

Coffee 說...

阿鵬︰

我連旅行都不喜歡的,不過足不出戶也可知天下事,我的江湖在書本上,自小閱卷無數......

Related Posts Plugin for WordPress, Blogger...