2012年4月15日星期日

買衫獨自行

向來不太喜歡無事也行街閒逛,習慣要買甚麼了才有目的上街去,這樣一來,慢慢造成了沒有行街購物的良伴,真的,近年來慢慢一個也沒有了,也算是自己有意無意所促成的罷。朋友要一齊廝磨慣了,結伴上街購物方能視之為一件樂事,有商有量,買甲不買乙,你我早已是各自肚裏的蟲。但都是難的,試想下,如果我想買換季衫,打算找一好友相伴,首先,對方要同時有空閒,因為不再是十八歲般的無所事事了;第二,對方須同自己衣著習慣接近,才有興趣給予意見;第三,對方的經濟能力和自己的相約,否則可能生出些不自在來。

經驗之中,和友一齊去買衫好多時都買不成的,你覺得好看的,她一盤冷水淋落嚟,老友嘛!她看上眼的,你亦老實不客氣評頭品足一番,都話明老友咯,梗係要俾啲到肉的意見架,唔通下下都應聲蟲般話好、好,咁冇誠意咩,話晒老友一場嘛!

還記得年青時和閏蜜們去行街買衫,那時大家都特別有空,又大家都特別沒有經濟能力,所以事前總有人提醒大家,千祈記得在誰一看便想掏錢時都阻止,多看幾家比較了價錢再回頭買也不遲,於是養成了一種默契,一定有人做醜人,每當有人心思思要敗家時,總有人在旁暗中阻止,拉東扯西而脫身,說轉頭再來。如今是再沒有這隻歌仔唱了,有人願意多付錢以換來少些麻煩少走些路;有人認為一、二百元一件夏天衫很貴,同樣價錢她在旺角買了十件,預了穿一個夏天就棄置;有人專搵每件衫只入貨一、二件的舖,貴少少唔緊要,至緊要唔好同人撞衫;還有一年薪過百萬的,她喜歡上深圳定做套裝 ,話價錢平又絕不會同人撞衫喎...真係五花百門,咩都有,點約埋一起去買衫呀!對了,還未計近年興起的網上買衫哩!

不過話說回來,其實我是享受自己一個人行街買衫的,亦只有自己一人時才買得成。


10 則留言:

卡臣 說...

我也喜歡自己買衫

SKII 說...

哈哈,我一時時!兩樣都有,不過要約埋一齊而目的係去行街的話,其實好鬼難約人,個個都無事忙(包括我自己),所以一個人去我又樂在其中!

路漫漫其修遠兮 說...

本來說行街買衫我沒資格插嘴, 不過看下去竟有兩點引起共鳴: 1. 除非有目的, 懶得逛街; 2.有伴一起逛街購物, 最大的好處, 莫過於當你被店員纏繞不知道如何拒絕時, 他一定能幫你脫險.

佛爺 說...

咁男生買電玩好得多,緊有一兩個專家在發言。

Coffee 說...

卡臣︰

因為著衫 taste 真係很個人的事。

Coffee 說...

SKII︰

除非係去買穿著開的既有品牌。

比起行街買衫,食餐飯易搞好多!

Coffee 說...

阿路︰

哈哈,你一定有很多俾啲姐姐仔圍到難脫身的經驗。

Coffee 說...

佛爺︰

當然啦,電玩只會越來越精,不存在個人風格,而穿衣就每個女生都有自己一套。

DeepC 說...

係wor, 我都好似無找朋友一起去買衫.
時間唔夠用, 有需要買新衫的話就速戰速, 唔等得咁多啦.

不過如果朋友找我陪去買衫都OK, 無記錯最常用的對白是: "你喜歡就得啦!"
這句真心架!

Coffee 說...

DeepC︰

我都會陪,多數都係買埋一份,我買衫有啲剎時衝動,所以免不了買完又唔係好鍾意:(

最常係午飯後有同事順道睇衫,佢哋問我意見,我就真係俾唔到咩意見咯:p

Related Posts Plugin for WordPress, Blogger...