2011年9月17日星期六

這就是我這個女人(2)

再話說實惠女職員入倉去取吸塵機吸管時,我發現陳列品下面擺放著眾吸塵機的實貨,於是我開始搜尋看有否我喜歡的那部日立,見到了,嘩!原來那部如此精巧的吸塵機,連吸管等一起包裝好時,整個箱子是好大好重的!絕不是我可以搬回家的!我原本打算看了吸管只要不騎哩難用,我便即時買走的。如何是好呢(唔知點解就是沒有想到送貨服務)?勞煩人哋入倉十幾分鐘,然後又不買,我的額頭即時貼上「運吉」二字。博大精深的大國智慧三十六計,我啥也沒學到,就學到走為上計,走為上計,嘿嘿!

我扮到若無其事地行出實惠,豎起耳仔用眼尾留意是否有人留意我,邊唸著︰睇我唔到,睇我唔到!出了實惠行遠了,我鬆了口氣,罵自己︰痴線架!

但這就是我這個女人!

不過我想買部吸塵機倒是真的,因為本不太近的樓盤工地及不知啥名堂的建築工地,順風向一吹,帶來很厚的塵,掃地抹塵到終於忍無可忍了!( 題外話,本來家中有部樂聲吸塵機,因為極少極少用,所以在二年多前送了給人,真想不到有用得著吸塵機的一天!) 於是去豐澤及大百貨電器部看過,沒有喜歡的,然後偶然在實惠見到了。

一星期後我才突然想起送貨服務,想起時忍不住在心裏失笑了!前幾日放工後,我再去看那部吸塵機。當我向旁邊的職員查詢時,她說去叫負責的同事來幫我。遠遠我就見到又是之前那女職員,哈!我心想每日咁多客,怎會記得!怎會認到!胖胖女職員再去取吸管讓我看(這次很快),當我問起送貸服務時,女職員稱買滿八百元可享公司免費送貸,而且公司在做推廣,如果一次買二件小家電,可再享88折。那部吸塵機原價六百多,折了賣五百多,如真買二件小電器,還可再88折,也不錯!我想到家中沒有獨立焗爐,只是微波爐有焗爐功能那種,烘焙多士、PIZZA,焗下蕃薯等還可以,要焗排骨、魚或烤雞或焗一盤海鮮芝士意粉等就不可以的,火候不足夠。對!我再挑選了個焗爐,樂信牌子,1500W的,二件家電合共也只是八百一十五元,比起女士的護膚品或甚麼的,真是超值!

付款時我和女職員講我之前來看過部吸塵機的,女職員說﹐「嗰日我拎咗吸管出來時,你走咗了!」我惟有支吾道,「你記得?係呀!」我望著胖胖女職員在處理收款事宜,想到她很厚道!二件小家電要下星期三才送貸,否則可讓大家一睹它們的靚仔樣。

14 則留言:

Ebenezer 說...

妳最後都番頭買啦,妳咁正常,邊有運吉?

Coffee 說...

Eben︰
見嗰啲試人一堆衫又唔買的,我真係做唔出。

卡臣 說...

其實sales都預咗有啲客唔買,否則一早發咗達。

Armadillo 說...

哈哈,我諗個售貨員一定有詛咒你!不過唔緊要啦,橫掂你又聽唔到!另外,1600W又嬌小玲瓏,真係幾吸引喎!我屋企嗰部牛龜咁大,都係得850W咋!

Coffee 說...

卡臣︰
是不可能一睇即買,所以我如果未打算買的,一般不會麻煩SALES。

Coffee 說...

Arm︰
佢睇我唔到,我聽佢唔到,嘿嘿!
我記得我之前嗰部都係850W的,而家新買哩部日立好的式,擺放時唔使咁多位。

熱血宅男 說...

不用太介意,他們一天到晚一定遇上不少真正「運吉」的客人

佛爺 說...

售貨員每天都遇上不同類型的人種,他們已習以為常了! 

SKII 說...

我覺得問清楚係正常嘅,啲 sales 請得喺度就係做呢啲嘢,如果唔係,乜都變成“自助”,好似超級市場咁就得啦,請佢哋來做乜呢?所以你唔洗介懷喎!

Coffee 說...

宅男︰
我係有啲介懷:P

Coffee 說...

佛爺︰
所以不喜歡一入間舖,即有人埋嚟。

Coffee 說...

SK︰
講真,我真係喜歡超市自助式的,怕麻煩人。

SKII 說...

其實我同你一樣,最怕啲人埋來問長問短,但有 sales 的店舖,我又 take for granted 我有野問嘅話,解答客人的疑問係佢哋的責任。

Coffee 說...

SK︰
講深入啲,我喜歡遇上講嘢有POINT,懂行銷的SALES。例如那些向我推銷了第一樣,我冇反應又或不喜歡的,立即又向我推銷第二樣、第三樣、第四樣...以為總會中一樣,殊不知這是最差勁的推銷手法,SALES已亮了張底牌給我,他/她並不了解自己的產品,亦未能在客人走入間舖時,已對來者心中有數。

Related Posts Plugin for WordPress, Blogger...