2010年10月22日星期五

有感於超越

超越!這段日子我常想寫之。

在香港這個人人行路快如風的城市,我自問絕不是一個快行者。但每當我在上班的途中或步入地鐡站後,我便下意識地行快了,旋即變身為一個左穿右插的急行者,我在超越大多數旁人。但原來想左右逢源地超越,是不簡單的一件事。每當我預備超越前者時,發現前面那位特別喜歡左右搖擺,以為佢行右,我選左邊超越吧,佢一個冷不防搖回左邊,真係收腳都收唔切。好喇喎,前面果個人一直都好哋哋行緊,我應可順利通過,點知佢唔知邊條筋抽起,無啦啦叉起隻手肘,好彩至今無被頂心無被頂肺,否則一嘢鬆落來,都咪話唔應!好似今早我行電梯左手邊上時,果位老兄唔知發咩神經突然撐起左手肘,雖然只係撞到我右手臂,但佢啲骨硬吖嘛,痛架!我低眼厲去(好惡),幾乎衝口而出︰喂!你好哋哋搭電梯就搭電梯啦!叉咩手踭呀!

還有,唔知點解梗有啲人喜歡二、三人並排慢步而行,條路已經窄了,點超呀!係,條路你行得,佢行得,但在一條窄路上二、三人並排慢步,即同打橫行無甚分別,這和你在自家的牀上打橫瞓,是有大不同的。另有一種在我快行時常遇到的,就是迎面而來的人,我總結到幾乎百分之九十以上的都比我先選行右或行左,但又好快擺向另一邊,累我跟住左右搖擺,嘿,你又想點呀?

由急步行超越的過程中,我粗略睇到三大類人。第一類,是自己行還能顧及身邊路人的;第二類,是自己行得順就是王道;第三類,是左右搖擺,行路有些些打倒氹一樣,既不知自己點行,更不理會有否阻途人。我在想,是否睇一個人行路點行,已知其生活、工作、學習中敏感點的高低。

14 則留言:

卡臣 說...

最憎行人扶手電梯上並排的人
你唔趕啫
我趕時間呀

Ebenezer 說...

最憎拖住買餸車仔四維轆d阿嬋,當人嘅腳唔怕輾咁樣!!!

S 說...

Coffee & Carson - 你地寫咗我的心聲。但有時我都唔明點解,著起返工衫,我硬係行得好快!?其實,好多時朝早,就算行慢少少我都仍然早到...但就係咁!

Coffee 說...

卡臣︰

我最不耐煩的是落電梯要企係度,基本一定要行住落,所以都好憎俾人擋住。

Coffee 說...

Eben︰

你講呢樣我都有同感,拉住架車仔大晒,似住你買佢驚。

Coffee 說...

SKII︰

絕對認同!一返工就行得急驚風般,係咁走!

韻味熊貓 說...

香港人的行路速度,全世界最快架!嘻嘻!

Coffee 說...

佛爺︰

香港人怕執輸!?:p

行得快好世界!

笑談風月 說...

我經常被行人的手表踫到手腕,痛到流眼淚,轉頭已不知是何人所為。香港不適合慢人生活。

Coffee 說...

風月︰

我好認同你講
>>香港不適合慢人生活。

Ebenezer 說...

哈哈,我咪就係曾經俾個老外,投訴我行路太快囉:)

http://ebenezer-ebenezer.blogspot.com/2010/10/blog-post_04.html

l.minor 說...

最怕就係有人阻住,跟住又俾人隔阻咗,而前邊個人又唔叫佢借借。

另外又常常遇到一d左搖右擺嘅人,就最難攪!

Coffee 說...

Eben︰

記得!你有水上飄的輕功嘛!

Coffee 說...

Minor L︰

就是這種情形最令趕時間的人心急!

Related Posts Plugin for WordPress, Blogger...