錫自己

幾個月冇去MB，真係覺得周身攰，所以即使得一PART七點鐘位，我都拿拿林去了。附近這間MB我只去過幾次，因為場細較難BOOK位，今日這個位都是別的人客今早取消才有的。去到還有十多分鐘才到七點，我先沖身，然後入蒸氣房坐了差不多十分鐘。

本來BOOK的是通淋巴，BODY師幫我通咗雙腿淋巴後，見我很攰，問我剩餘時間是否想轉為按背穴位。我知自己近日骨火重，因前些日子二次作感冒最後都沒有發出，令到個人好攰，所以我同意轉為按背，而基本上，我如此疲乏的身軀，只要不太差，其實她點按我都會覺得舒服的。不過今日這位BODY師手勢又真係不錯，好夠力，特別是按背穴位時，痛到我要忍住唔抖氣，才能就到她的力度，我又唔想叫她就力，我有被虐偏好？非也！因為覺得痛才出得到骨火。記得我去開的佐敦那間，相熟BODY師曾解釋過，當身體越攰，按下去便會越覺得痛，但如果就力輕輕按，效果便不理想了。所以我忍！忍！忍！

四十五分鐘眨下眼就到了，雖然有些到喉唔到肺，但已經覺得百般鬆弛，之前周身隱隱約約的冤冤痛痛消失了，真舒服呀！完了時，貼心的BODY師還為我送來一杯意米水。

八時多人客很少了，我施施然沖個靚涼，離開。