2013年9月7日星期六

女人用一碗食剩的口水麵湯愛惜男人

由我坐下時便見隔離枱男人在用手機 (看他的年紀已遠不是沉迷打機的一族了,所以不知在幹啥),而他的那碗雲吞麵被冷落在一旁。到我開始食我的雲吞麵時,那男人仍在忙著按手機。隔了一會,聽見他對面的女人說仲唔食,你的麵索晒水喇,那刻我才知他倆是一搭的。接著便出現了在我看來絕對匪夷所思的事情,那女人已食完自己碗麵,剩下半碗口水麵湯,只見她一聲不響,便將食剩的口水麵湯如數倒入那男人的那碗雲吞麵中,驚嚇呀!無論幾好修養都難掩那刻眼球所受到的驚嚇,女人側眼瞄了我一眼,謝謝,原來店內其他人不是透明的。那男人開始食麵時我有很噁心的感覺。

一會兒後,聽見那男人說︰你連湯都飲晒呀?一大把年紀的女人說︰唔係,我倒晒俾你,你碗麵索晒水喇,你自己都唔識珍惜自己,有邊個會珍惜你呀。原來將自己食剩的麵湯倒入對方索了水的碗麵中係一種珍惜,再好聽啲係愛哩,好無!愛可以很肉麻,但請將講衛生同愛的肉麻分清楚好嗎!親暱係情到濃時化不開的,一碗麵兩份食,你食一啖我食一啖,一杯清水都要兩份飲;再或者人會自吞口中津液,和愛侶深吻時都會有之。但是,試下你無情情又或者你的愛侶無情情吐少少口水入你杯茶中,你還會想飲嗎?而今有女人用一碗食剩的口水麵湯,要將我關於愛的肉麻和不講衛生的核突,兩者的定義撕裂,好不大煞風景。

我以為當時那種情況,愛惜下的肉麻可以是這樣的,他忙緊正事,令碗麵索了水,因著緊他會食得失了口感失了味,不想麻煩店家之下,可以行幾步之遙替他捧回去叫店家添點清湯,同時又為冷了的麵加回熱度,捧回來給他時可順勢搣下他面珠,或輕攬下他,俯身在他耳邊低語︰快吃啦!





8 則留言:

菲菲 說...

我估你見對的那對男女係中年+

雖然我都步入中年,但都做唔到咁「愛」的行為…

DeepC 說...

又咁啱比你看到. ^^
(先聲名, 我唔識佢. ^^")

Coffee 說...

菲菲︰

你講得啱,同埋我覺得佢嘅珍惜論係有意無意講俾我聽嘅,因為佢見我望住佢倒剩湯入男人碗麵,而我一定露出了某種神情。

Coffee 說...

DeepC︰

一張可坐六人的長桌,我坐正喺男人隔離,實望到,加上我沒玩手機,對眼咪四周打量囉,哈哈!

我第一次見,唉吔,死火,千祈唔好有網友或其親人有此生活習慣:P

佛爺 說...

好題材!我有靈感!嘻嘻!

Coffee 說...

佛爺︰

其實我有諗過係咪我太大驚小怪了。

等睇你得到咩靈感:)

Ebenezer 說...

愛情真係偉大!

Coffee 說...

Eben︰

呀!Kiss Ok,但食口水麵湯唔Ok!

Related Posts Plugin for WordPress, Blogger...