「people mountain people sea」之孝子賢孫

一如既往，以為不要太接近清明正日，會少些人去拜祭先人，不用太過擠逼。這想法，已被證實係集體智慧，因為今日的「將軍澳華人永遠墳場」，是所有人口中說出未曾試過的「people mountain people sea」！

除咗專線九巴S14往返墳場及油塘地鐡附近，其餘任何車輛不得駛往。原本在油塘排隊等乘坐S14，但排下排下見唔對路，望著前方的人潮及打緊的蛇餅，計下分分鐘要成個鐘才上到車。於是改乘的士往山腳，然後徒步上山。幸好今日唔曬，可以行得幾輕鬆。

不過今日在墳場實施的人潮管制安排得不好，曾有段時間是S14車輛無法循環對開，完成拜祭的人，排隊等車的又是長到望不見龍尾，唔等車的，想步行落山，但無路可行！因條路被錯誤管制！步行上山及步行下山的人靠一個樽頸位進入或離開墳場。本來七、八個墳場護衛員築成的人牆，攔截人潮俾車過，但啲車很久都未開(唔知咩原因，可能某個位被人潮塞住吧)，欲步行下山的人越來越多，單靠那個細樽頸位點能有效疏導人潮？人群開始鼓噪起來，不斷聽到四面八方的投訴安排不妥的聲音，有護衛員Call警員來增援。未幾，護衛人牆終於被不斷湧來的人潮沖開，始可步行下山。原本行在路中的人群亦自覺聽從呼籲，慢慢行番入人行道，不久，見S14車輛開動了...

下次拜祭先人，在日期及時間選擇上，是否要反智而行呢？但當人人都反智時，反智咪又變成集體智慧！