2009年11月20日星期五

擺上枱

前晚返畫班,肥師姐坐我隔離。

肥師姐︰陣間落堂去唔去食嘢?
咖啡︰ 我食咗飯喇。
肥師姐︰咁你飲嘢呀。

肥師姐在我們這個畫班係幾領導型的,又送過宣紙給我(證明咖啡貪小便宜)。

咖啡︰ 嗯嗯....但咁夜食嘢好易肥喎...
肥師姐︰得喇,我咁肥都未驚,叫埋老師去。
咖啡︰ 吓!

仲有二十分鐘才落堂,肥師姐開聲了,

肥師姐︰老師,新同學(咖啡)來咗咁耐都未一齊去食過嘢,唔夠關心同學,陣間落堂去飲嘢呀?各位同學,一齊呀!

除咗一位同學有事要趕住走,其餘全部同學竟然一窩蜂和應。我無諗到肥師姐擺我上枱,但見老師和十位同學都話好,我惟有在枱底輕輕踢肥師姐一下以示抗議。接著一個二個勁快執嘢,未夠鐘落堂已要求老師落堂!

肥師姐是個幾硬朗的女人,說話很風趣。食嘢時她擺了自己女兒上枱,明明是投訴女兒學校的老師未處理好事情,她却描述得讓眾人笑了。肥師姐女兒應該是天生麗質,學校都幾多男同學追,有男同學甚至為她打過交,而女同學就很憎她,在老師眼裡肥師姐女兒是始作俑者,是無心讀書的壤女孩。老師請肥師姐回校商討如何管教女兒,肥師姐說啲老師很針對她女兒,當正女兒是紅顏禍水,肥師姐說越聽越火滾,來氣了,她望著那位男老師,一字一句地說︰老師,我由剛才踏入校門,一見到你就喜歡上你,我很喜歡你,老師你是否應該檢討下自己有咩問題呢?

我們就是聽到這裡大笑起來的!

2 則留言:

笑談風月 說...

我之所以喜歡《宮心計》,因為可以認識女人。我是家裡唯一女兒,對女性的認識要刻意學習。肥師姐確實是厲害角色,男老師應該無從招架。
不過,你還是不要讓她有下一次擺妳上枱的機會,她會養成習慣的。

Coffee n Tea 說...

風月︰我都是家中唯一女兒,我知有些先天不足!但我以後識避開架喇。謝謝你!

Related Posts Plugin for WordPress, Blogger...