2009年11月17日星期二

體味侵犯

我有個習慣,如果當天發生的事去到第二日仍不時記番起,我便想將之寫下來。

昨天放早,我預約咗去MB做facial,之後再沖埋涼,感覺好舒暢、清新,塞上耳機邊聽音樂邊等巴士回家。好快,車來了,我見下層都多人,便上樓上,車尾還有二排位無人坐,我行到尾坐在其中一窗口位,跟我身後有一家三口,夫婦及一名約16、17歲的女兒。那女兒行在最前,選坐另一窗口位,媽媽行第二,在她未坐下前,我以為她會坐我隔離,但她竟然坐在女兒旁邊的位,剩下她老公便坐係我隔離。

那個男人一坐下,我聞到他身上一陣勁難聞的刺烈的煙味!那刻我才知,原來有時無奈之下聞到別人燃點著的二手煙,並不是那麼難頂的,討厭,可能其中大部分原因是因二手煙侵犯了自己的人權。而一個人的細胞、血液被煙燻透後,再由其身體皮層毛孔散發出來的臭煙味,那才是極級難頂的剌臭!!!!那刻,我想起身轉位,但又做唔出呀!然後我在心責怪他老婆,明知個老公咁臭都唔提佢注意,可能多飲湯水或多飲些甚麼涼茶,都唔至於咁臭咯!況且家中有個16、17歲的女兒,花樣年華的女孩子多要漂亮、多要清新呀!是習慣了嗎?

在平日,我總覺得約半粒鐘的車程有些短,想坐耐少少多睇下窗外風景,但果刻,我如坐針氈,同時作最最微弱的呼吸,祈求快啲喇快啲喇!我將身體坐前,仍聞到,將頭擰去埋邊,仍聞到,真的真的頂唔順!我記起手袋有支香水姐姐送的香水版仔,好像發現救命稻草一樣,我手持香水版仔半掩鼻呼吸,好些,但如手稍有被車的晃動振開,又聞到!嘩,簡直係惡夢!剛才上車前的清新已離我十萬八千里遠了。

那一家子早我一站落車,我方能呼吸!

回到家,我第一時間再沖涼,但首當其衝的鼻子,到現在仍未完全逃離那陣刺烈!

4 則留言:

笑談風月 說...

Lemon皮最能解體味,他應該多吃。你很慘呀!明早喝lemon tea,吃點皮,可解味,試試吧!

Coffee n Tea 說...

風月︰太感激你喇!我明早即刻飲檸檬茶,吃皮。
我的鼻吸氣接落到喉嚨的位,至今仍有種刺刺感。不過,我諗我如咁唔好彩再遇這種情況,我一定會轉位架啦,轉去下層未唔使尷尬咯,真係死蠢!

卡臣 說...

不是歧視
有一次我搭冷氣巴士
企了一位地盤工人
他活像一個煙爐
每口呼出的氣都是煙味
我立即鑽走

Coffee n Tea 說...

卡臣︰謝謝光臨!
我日日搭地鐡,身邊常有不同乘客,仲有啲情況都好乞人憎架,例如早上返工企都無位企時,佢大哥或大姐仲要坐係度支起二郎腿,企在他/她們前面真慘咯!

Related Posts Plugin for WordPress, Blogger...