2011年12月10日星期六

我的那碗米飯

向來對食的要求不高,但對米飯倒是有偏好。喜歡食有少少糅韌咬口的米飯,煮好掀起煲蓋時只見似乎有層油光在面,一粒粒的米飯仍看得出米粒的樣子,能吃出米的甘香米的甜,有少少的嚼勁,但又絕對不是硬巴巴的。那便是我的那碗米飯!吃這樣的米飯,是完全不用在意有沒有好餸菜的,太濃的味還怕會搶去米飯的香甜呢!

我平日買的二、三種泰國米是吃不出這種喜好來的,所以越來越不喜歡食飯,實在是不喜歡食那鬆鬆散散的飯粒子。早些時候在華潤什麼的小超市購物,當時有個優惠,買滿一百加三十九元換購一包五公斤的米,見是中國江西產的絲苗米,想起我曾食過很好食的絲苗米,於是抱著不妨一試的心態,便換購了。舊米食完,近日開那江西絲苗米煮飯來食,真沒想到,外觀比泰國米細去近半的絲苗米,吃進嘴裏,嚼來有些像我心目中的那碗米飯呢。嗨,這不起眼的中國江西絲苗米,讓我吃出了一些對米飯的偏好,雖則只是一些,但已勝過那些鬆鬆散散的飯粒子。日後我自會尋這絲苗米再買去,只希望別把自己慢慢吃出個胖子來。

 

24 則留言:

陽光的戀人 說...

寫得好. 有次參加雅居樂搞的騎單車一天遊, 中午飯吃的是農家飯, 那些米飯超好吃, 不知道是不是自己種中山土產的, 顆粒也不大, 令我重拾吃米飯的興趣, 也對米粒大的像泰國米才好吃改觀. 我見百佳有種台灣米想買來試, 可是定價太貴捨不得, 妳說的這種不算貴, 又形容得那麼好吃, 我要試試.

Ebenezer 說...

唉!講落我都好耐未食過可口嘅靚飯:(

Coffee 說...

阿路︰
以前食的泰國金鳳或金象,好似好好多,家下食下食下好似變咗另外一樣嘢咁。
我去大陸時都食過好好食的米飯,但不易搵到。
我貼文提及的,最衰當時沒影下相,只記得是江西絲苗米。

Coffee 說...

Eben︰
係架!食過靚米飯記憶會好深,友人曾轉贈我一包超好食的中國東北米,再找不到。

攞你命三千 說...

我覺得呢d同水土氣候好有關係~
有咩地方可以買靚米請介紹下

Coffee 說...

三千︰
同埋而家一味改良改良,一年多一、二造,唔知係咪都影響到啲米唔係咁好食了。
至於靚米,我都想搵呀,暫時我就只是發現呢隻江西絲苗米較合我口味。
唔知有冇網友有好介紹呢?

Armadillo 說...

我一向對米冇乜要求,以前返大陸旅行,食嘅都係米碌,仲有一陣「行」味添,總之肚餓就乜都食得落架喇!

Coffee 說...

你對飲食比我有心得有要求,偏對米就得過且過,而我這個對飲食求其得多嘅,又偏對米有啲要求,哈哈!
BTW,咩係米碌:P

Armadillo 說...

米碌即係唔完整嘅米,品質通常比較差,冇米香之餘仲可能會有陣「行」味。我細個時都食過米碌,而家連大陸都富起嚟,相信唔會有幾多人知道乜嘢係米碌喇!

攞你命三千 說...

多多少少實有影響的,差在我地覺唔覺

我想食元朗絲苗多d,奈何呢樣野已經冇咩可能再出現

Coffee 說...

Arm︰
米不是由穀走出來便是了的嗎,原來仲有未完整的米,我又知多一樣嘢。

Coffee 說...

三千︰
我未食過元朗絲苗米:(
正宗的一定很好食!

卡臣 說...

我愛日本米啊

Armadillo 說...

點解米會變成米碌,可以去以下網址睇吓,有圖有解釋,一睇就明:
http://gogoldjoe.blogspot.com/2011/03/blog-post_6961.html

Unknown 說...

果然是半個食家

Coffee 說...

卡臣︰
日本珍珠米?噢,呢個我不喜歡:P

Coffee 說...

Arm︰
剛去看了,明白晒:)

Coffee 說...

艾德︰
唉呀~食家!
我對食係基本上冇乜要求架:p

韻味熊貓 說...

咖啡:

你都算好野,一粒米竟可寫了一段文,兼而有咁多回響。米飯對亞洲人來說,真是十分重要。

火女 說...

我真的很少在家煮飯! 不過有機會也想買一包你所講的正米試下!

又, 米其實都有保質期的吧?

Coffee 說...

佛爺︰
係一碗飯呀,好多好多粒米架!

Coffee 說...

火女︰
該有保質期的,所以如果人少又或者你自己住,就不用買呀,否則食到何年何月,好食都變唔好食喇!

五珍 說...

白米都咁有研究,不過真係好米難求,明明同一個牌子,每一袋都質素參差。

Coffee 說...

你講的又係,同一牌子都食出不同。

Related Posts Plugin for WordPress, Blogger...