2010年12月18日星期六

養兒

昨晚貼完文後,見天寒地凍,lili拿拿縮上牀瞓覺。我係易入睡之人,矇矓中電話響,一看來電,沒有姓名,已入睡的我有一刻想過不接聽電話的。一聽即醒晒,原來是好朋友仔C的媽咪打來搵仔的,我望下時間,十二時零九分!C媽咪話C放學至今未回家,問是否和言一齊。我睡意全消,冒著寒冷坐起身,告訴C媽咪,言整晚在家,現在已睡了。

之後我無法再入睡,決定起身拍言仔門,問下是否知C的行蹤。幾經辛苦才拍醒沉睡中的言,稱C放學後和幾個同學去pizza hut食嘢,之後啲同學各自回家,當時C打過電話給言,稱不想回家,言有叫C快點回家,還即時打電話通知了校社工,但之後就打唔通C的電話了。我著言快快將情況以信息方式通知C媽咪,搞掂後我在牀上起碼折騰了一小時方再入睡。

第二朝起來,我心掛掛C唔知點了?原來整晚未回!電話仍然打唔通!講真,我不安的心情加劇了,是很不安,言問︰又唔關你事,點解你咁擔心嘅?我望著言說,你們是好朋友,C媽咪昨晚亦話C平日和你玩得最多。言聞言不語,若有所思。我再說,如果我的兒子通宵不回,又音訊全無,我一定會發癲咁通宵到處搵,我 受不起這個打擊!

直到今早十一點,C才SEND了個信息給媽咪和言,但就不肯透露自己在邊,亦不肯回家,之後又再失去消息。C的確是言的好朋友仔,以我和言的交情,言不時都會將C的情況告訴我,連C的父母如何管教C我都略知七、八。言曾有一次說,C的父母完全唔識教仔!唉,畢竟是別人家的事,我不方便多言,但我又真的覺得有更好的方法,而C媽咪長期被C激怒,盛怒下怎能處理好親子關係呢!要知道,C成績不俗,八級琴技,還習一樣不知甚麼拳,好明顯,是個資優生,但觀其處事可見EQ奇低,似乎全職在家看管仔女的媽咪未能讓C適當地抽枝發芽,而C的父親更是個受過極高等教育的人,但態度、方法太強硬。

上午忙完後,一點多回到家,我終於忍不住打了個電話給C媽咪。聽得出C媽咪幾乎按捺不住自己的怒火,講!講!講!我見空位插了句,不如先氹咗個仔回家,同個仔傾下,聽下個仔點講吖,但C媽咪又是一輪嘴,還稱自己管不到了,已交給父親去管,講!講!講!...

我知道我知道,C媽咪在管教呢個仔上一定心力交瘁了,無法退一步去思考,壓力大到令她忘記了聆聽比說話重要,或是她本就不知。我自問都唔識教仔,但我一定會聆聽,而反叛少年更需要聆聽。C媽咪講完後稱謝謝我關心,然後收線了。我很難過,為C媽咪感到難過,更為C感到難過,因為C是言的好朋友仔,是他激發起言投入練琴的,二人常去琴行鬥琴,看誰練得如何了,真的很難過!C有比我們優質很多的家庭環境,但不想回家!

(今晚外出和朋友食飯,但極心不在焉,希望C安好!)
 

16 則留言:

Armadillo 說...

雖然我冇仔女,不過就覺得而家細路真係好難教,可能係民主意識提高咗啦。我地以前邊敢離家出走呀!

卡臣 說...

家家有本難唸的經

Otto 說...

青少年總會有反叛期, 你我都曾經歷過. 只係希望佢平日累積返黎既生活經驗可以蓋過佢一時既任性, 唔好係出面學壞就可以呢~~

越肉赤, 越比自己太大壓力啦~對佢對自己都絕對唔係一件好事!

笑談風月 說...

所以說,要事情不脫軌,要從小時與小事做起,否則大時與大事就見真章。

佛爺 說...

咖啡:

這種心態叫做「身份危機」。有青少年會很早出現,有人會很遲,有人不會出現,嚴重的會離家出走。有一些出走一段短時間便會返家,有一些便成了街童,雛妓等,形成青少年犯罪的根源。

Coffee n Tea 說...

Arm︰

而家啲細路真係極難教,一百個細路一百個樣,我哋以前果套更加唔可以生搬硬套過來用了,要不斷靈活變通,仲首先一定要有計傾,以家長身份朋友心態來見招拆招。
好唔容易,所以好多人選擇唔生小朋友。

Coffee n Tea 說...

卡臣︰

又係!一家唔知一家事!

Coffee n Tea 說...

Otto︰

係呀!青少年反叛期是極危險的時期,最要留神的階段,好易學壞就係呢個時候了。

Coffee n Tea 說...

風月︰

的確係任重而道遠!

Coffee n Tea 說...

佛爺︰

所以係咪要給予少年更多的包容,起碼覺得在家在安全感先,離家出走好易在個人意志未建立時,步入斜途。

l.minor 說...

管教小朋友真係一大學問,自問無能力勝任,所以...

我爸自小亦管教甚嚴,而且非常惡,所以我只敢惱不敢言,攪到我當時在家尚算(扮)聽話,不過一回到學校,就是個倒旦的學生,幸好有班好同學,教會朋友,最後沒有行差踏錯...

咖啡妳說得對,大人不能永遠只叫小朋友跟著做,也需要聽小朋友的需要

小朋友都有小朋友的壓力架!

Coffee n Tea 說...

minor︰

所以你不打算生育朋友!:P
教導小朋友絕不容易,每個小朋友又都不一樣,所以不能一本天書讀到尾,正所謂因材施教。一路走來,我都覺得自己唔識教,但無礙自己做個好媽咪。

l.minor 說...

Coffee:
唔係喎!從妳字裡行間,睇得到妳係睇貼的媽咪啊!

Coffee n Tea 說...

minor︰

謝謝你讚賞!

養兒教兒,我走過嘔心瀝血的路程,但即使崩潰於自己唔識教子,都有一樣從未失過的,就係愛孩子!

the8 說...

剛剛看報紙有一則失踪兒童新聞,心血來潮的問句 C 回來了麼?

Coffee n Tea 說...

the8︰

有心喇!謝謝你!
還有很長下文,不過終於都回家了!:)

Related Posts Plugin for WordPress, Blogger...