2014年10月16日星期四

而我不知鮮淮山的皂角甙

一般人都知道進食新鮮淮山對身體好有益,我都知。見近日得得閒閒,便買了條新鮮淮山嚟煲豬骨。

但我唔知道削鮮淮山皮係有講究的,唔知一般人知唔知呢!最好戴著膠手套,或者邊削邊開著水喉用小水流沖洗,不讓淮山皮下滲出的白色汁液沾上手,否則的話,你有可能同我一樣會中招。我一直以為削鮮淮山皮同削蕃薯皮、青瓜皮沒甚麼兩樣。用水沖洗下表皮便開始削,削了幾刀後拎住鮮淮山的左手開始覺得痕癢,且來勢洶洶,很快便痕癢得很厲害。當下心知該是淮山滲出的白色滑潺潺的汁液惹的禍,情況應該跟刨芋頭皮有可能令手痕癢一樣,但感覺比刨芋頭皮犀利。

由覺得痕癢開始我已開水喉沖洗,沒想過可以停下來戴手套,一心想著快快完成。忍住越來越令人抓狂的痕癢,直到切好淮山將淮山放進湯煲後才處理早已痕癢難當的雙手。對,原本只係左手拎住淮山,但左手痕時好自然的反應係用右手去拗痕,沒想到這樣便將沾在左手的汁液傳到了右手(這是事後領悟的),所以兩隻手都好痕好痕。

邊沖水邊出力拗,真係痕得好緊要,見手腕位紅了起來,開始擔心會唔會演變成皮膚敏感要去看醫生,同時搜索枯腸家中有甚麼可止痕的藥膏,或者有甚麼豉油、豆粉、糖之類的民間智慧可以用來急救住先,但成個腦一遍空白,憑空啥也想不到。只見眼前有鹽,於是想到鹽好似有消炎殺菌功效,唔理得咁多了,即刻取少少在雙手掌中用水濕潤下,便開始將鹽摩擦到雙掌及前手臂。頂吖!比之前更加痕更加紅了。鹽的微粒將皮膚磨薄了,啲痕癢度升了級。頂!頂!心入邊一直在鬧!

這時在鍋出緊水的排骨頭水滾了,我又再忍住痕,一手抓筷子一手抓湯勺,將排骨頭翻動幾下,然後挾過去湯煲。你,信唔信有奇蹟?而我,信了!有時真係有架!在翻動排骨頭時,水滾了釋放出來的高熱水蒸氣蒸上了左右手,瞬間便覺得雙手沒有那麼刺癢了。不過當時完全沒有意識到甚麼,以為剛才抹上的鹽在起作用,雖然當時擦上鹽時很刺癢,但總之就沒意識到是高熱蒸氣舒緩了痕癢。

弄好了那煲湯,即刻上網查看看有沒有甚麼方法止痕。哈,得知原來鮮淮山皮下滲出的汁液叫皂角甙,可令人皮膚極度痕癢,只有在遇熱時才會被破壞。即係剛才誤打誤撞下,水滾時的高熱水蒸氣破壞了鮮淮山皮下的皂角甙,是以一秒前還刺烈的痕癢得以舒緩了。網上教話還有另一方法就是搽白醋,因我的痕癢已舒緩了大部分,所以沒試白醋。如果當其時沒有煲湯有熱蒸氣的,可開爐用小火烤下,破壞掉皂角甙,便可解決由鮮淮山的皂角甙引起的痕癢。




2 則留言:

DeepC 說...

叻! 而且很好運!:)

Coffee 說...

DeepC︰

真係有啲好運!

Related Posts Plugin for WordPress, Blogger...